ოქტომბერში Tatuza Jazz Club ჯაზის მოყვარულებს განსაკუთრებულ, მრავალფეროვან მუსიკალურ პროგრამას სთავაზობს. თვის განმავლობაში კლუბის სცენას დაიკავებენ როგორც ადგილობრივი, ისე საერთაშორისო შემსრულებლები.
თვის რეზიდენტი: Shannon Gibbons Quartet (15, 17, 18, 21, 24, 25, 28 და 30 ოქტომბერი)
Tatuza-ს ოქტომბრის თვის მთავარი რეზიდენტი შენონ გიბონსის კვარტეტია. შენონ გიბონსი ნიუ-იორკში მოღვაწე მომღერალი და სიმღერების ავტორია, რომლის მუსიკალური კარიერაც 16 წლის ასაკში დაიწყო. მას ცოცხალი შესრულებისა და სტუდიური ჩანაწერების მდიდარი გამოცდილება აქვს, მისი საავტორო ნამუშევრები კი უკვე ცნობილია საერთაშორისო აუდიტორიისთვის. შენონის მუსიკა გაჟღერდა Netflix-ის პოპულარულ პროექტში – Temptation Island, ასევე 2020 წლის American Idol-ში.
გიბონსისთვის მუსიკა ადამიანებთან ურთიერთობისა და პირადი გამოცდილებების გაზიარების საუკეთესო ენაა. ის განსაკუთრებული გულმოდგინებით არჩევს საკონცერტო რეპერტუარს და ქმნის ისეთ სეტლისტებს, რომლებიც თითოეულ მსმენელს ემოციურად ეხმიანება. კვარტეტის შემადგენლობაში არიან: შენონ გიბონსი – ვოკალი, ნიკ შოიბლი – დრამი, ლეონიკე შოიბლი – კლავიში / ფორტეპიანო და ტიმ გივენსი – ბასი.
15 ოქტომბერს Tatuza Jazz Club-ის სცენას მსოფლიოში ცნობილი ქართველი პიანისტის, ბექა გოჩიაშვილის ტრიო დაიკავებს. მასთან ერთად სცენაზე იქნებიან ქართული ჯაზ-სცენის გამორჩეული მუსიკოსები: ლევან დეისაძე (ბასი) და ზაზა ცერცვაძე (დრამი).
16 და 23 ოქტომბერს Tatuza Jazz Club-ის სტუმრებს საშუალება ექნებათ, ორ მუსიკალურ პროგრამას დაესწრონ. საღამოს ზურა რამიშვილის კვარტეტი გახსნის და შენონ გიბონსის კვარტეტი დაახურავს.
22 ოქტომბერს Tatuza Jazz Club-ის სცენა ირაკლი ჭოლაძის Quintet Nu-ს დაეთმობა, რომელიც მსმენელს ახალ ალბომს წარუდგენს.
29 ოქტომბერს Tatuza Jazz Club პერე ნავაროს თავის კვარტეტთან ერთად უმასპინძლებს. პერე ნავარო ჯაზმუსიკოსია, რომელმაც ევროპულ მუსიკალურ სივრცეში ახალი სიტყვა თქვა აფრო-ამერიკული და ესპანური ჯაზის ეკლექტიკური ჟღერადობის სინთეზით. მას გამოშვებული აქვს სამი ალბომი და მსოფლიოს პრესტიჟული ფესტივალების ხშირი სტუმარია.
ოქტომბერში Tatuza Jazz Club-ის საღამოებზე კარი 21:00 საათზე გაიღება, ხოლო კონცერტები 22:00 საათზე დაიწყება.
ბილეთების შეძენა შესაძლებელია როგორც ონლაინ, ასევე ადგილზე. TBC Concept-ის Visa ბარათისა და Visa Signature სამოგზაურო ბარათის მფლობელებისთვის მოქმედებს 15%-იანი ფასდაკლება.
ბილეთების შესაძენად ეწვიეთ ბმულს.
