22 ოქტომბერს Kordz-ისა და მარტოკაცის კოლაბორაციული სიმღერა „არამი დო შარიქა“ გამოვიდა. ნამუშევარი მეგრული ხალხური სიმღერის ახლებური ინტერპრეტაციაა, რომელშიც არტისტები ქართულ ფოლკლორსა და თანამედროვე მუსიკალურ მიდგომას აერთიანებენ.
მსმენელისთვის კარგად ნაცნობი ელექტრონული მუსიკის პროდიუსერი, კომპოზიტორი და შემსრულებელი Kordz (ალექსანდრე კორძაია) ამჯერადაც თავისი ხელწერის ერთგული რჩება, ის ფართო აუდიტორიისთვის აკადემიური, კლასიკური მუსიკალური განათლებისა და თანამედროვე ელექტრონული ჟღერადობების ოსტატური, ორიგინალური სინთეზით არის ცნობილი.
მარტოკაცი, რომლის ნამდვილი სახელია დამიანე გორდელაძე, ქართველი ვიდეობლოგერია, რომელიც სოციალურ ქსელებში იუმორისტულ, მუსიკალურ და შემეცნებით კონტენტს ქმნის. მის შემოქმედებაში განსაკუთრებული ადგილი ქართულ კუთხურ ხასიათს, ტრადიციებს, ფოლკლორსა და იუმორს უკავია.
„არამი დო შარიქა“ ორი განსხვავებული შემოქმედებითი ხედვის შეხვედრაა – Kordz-ის ელექტრონული ჟღერადობა და მარტოკაცის ავთენტური შესრულება მეგრულ ხალხურ სიმღერას ახალ სიცოცხლეს სძენს.
მოუსმინეთ „არამი დო შარიქას“
