უკრაინა ერთ-ერთი პირველი ქვეყანაა, რომელმაც მომავალ წელს, ევროვიზიის მუსიკალურ კონკურსზე, წარსადგენი მონაწილეები გამოავლინა. კონკურსანტების გამოსვლა რუსეთთან მიმდინარე ომის გამო, კიევის თავშესაფარში შედგა, რა დროსაც გამარჯვებული, ელექტრონული მუსიკის დუეტი – TVORCHI დასახელდა.
როგორც ცნობილია ევროვიზიის კონკურსის სიმღერის შერჩევა Vidbir-ის მეშვეობით ხდება. კონკურსი მეტრო სადგურიდან პირდაპირ ეთერში გადაიცემოდა. თებერვალში უკრაინაში რუსეთის შეჭრის შემდეგ ეს ადგილი თავშესაფრად იქცა, ამის შესახებ ინფორმაციას – BBC და ევროვიზია ავრცელებს. მეტრო სადგური სპეციალურად ევროვიზიის კონკურსისთვის სასცენო სივრცედ გადაკეთდა და შოუ შაბათს, 17 დეკემბერს, პირდაპირ ეთერში გადაიცა.
„ჩვენ ყველაფერი გავაკეთეთ იმისთვის რომ Vidbir – სრულყოფილად ჩაგვეტარებინა. ამ მნიშვნელოვანი არჩევანის ირგვლივ კიდევ ერთხელ გავაერთიანეთ უკრაინელები, რათა ევროპის უდიდესი მუსიკალური კონკურსისთვის ჩვენი მონაწილე შეგვერჩია. მივიღეთ გადაწყვეტილება, რომ შოუ თავშესაფარში ჩაგვეტარებინა, რადგან ეს უსაფრთხო გარემოს და კონკურსის შეუფერხებლად ჩატარების საშუალებას მოგვცემდა.“ – განმარტა ოქსანა სკაბინსკიმ, ევროვიზიის უკრაინის დელეგაციის ხელმძღვანელმა – BBC-თან.
TVORCHI-ის წევრებმა ანდრია ჰუცულიანკმა და ჯიმოჰ ავგუსტუს კეჰენდიმ სიმღერა Heart of Steel – მოცეკვავეების თანხლებით შეასრულეს, რომელთაც ოქროსფერი აირწინაღი ეკეთათ. სიმღერის ტექსტი კი ასეთია: „არ მაინტერესებს რას ამბობ, არ მაინტერესებს რას გრძნობ, ჩამომშორდი გზიდან რადგან მე ფოლადის გული მაქვს.“
დუეტი TVORCHI – 2023 წლის ევროვიზიაზე მაისში, ლივერპულში გაემგზავრება. შარშან, ევროვიზიის კონკურსზე, უკრაინულმა ბენდმა Kalush Orchestra სიმღერით Stefania – გაიმარჯვა.
ნახეთ, TVORCHI-ს გამარჯვებული სიმღერა Heart of Steel.
