პოსტპროდუქციის ქართულმა კომპანია POSTRED-მა კიდევ ერთ მნიშვნელოვან პროექტზე იმუშავა. საუბარია პამელა ანდერსონის შესახებ გადაღებულ დოკუმენტურ ფილმზე, სახელწოდებით Pamela, a love story, რომელიც სტრიმინგ სერვის Netflix-ზე 31 იანვარს გამოვა. დოკუმენტური ფილმისთვის POSTRED-ის დამფუძნებელმა ბესო კაჭარავამ ხმის დიზაინზე იმუშავა, ხოლო POSTRED-ის გუნდმა ფოლი გააკეთა.
პროექტის ფარგლებში POSTRED-მა „ემის“ ჯილდოს მფლობელ ხმის დიზაინერ ზაქ სივერსთან ერთად იმუშავა. აღსანიშნავია, რომ სწორედ ზაქ სივერსთან თანამშრომლობით, POSTRED-მა მონაწილეობა მიიღო ისეთი ნამუშვრების შექმნაში, როგორებიც არის: “C’mon, C’mon” ხოაკინ ფენიქსის მონაწილეობით , “Raymond & Ray” ითან ჰოუკისა და ევან მაკგრეგორის მონაწილეობით, ასევე ანიმაცია “My Father’s Dragon, რომლის რეჟისორი ოსკარის ნომინანტი ნორა თუმეია.
„POSTRED-ის გუნდისათვის ხარისხი უპირველეს პრიორიტეტად იქცა და მასზე უფრო დიდ ყურადღებას ვამახვილებთ, ვიდრე რაოდენობაზე. ამის საშუალებას სწორედ მასშტაბური პროექტების ბიუჯეტი გვაძლევს. Netflix ცნობილია თავისი დოკუმენტური ფილმებით და გვიხარია, რომ ერთ-ერთ მათგანზე ჩვენც ვიმუშავეთ“ – აღნიშნავს Billboard Georgia-სთან საუბრისას POSTRED-ის დამფუძნებელი, ხმის დიზაინერი ბესო კაჭარავა.
მსოფლიოს წამყვან კინოკომპანიებთან და სტრიმინგ სერვისებთან თანამშრომლობის გარდა, POSTRED საგანმანათლებლო მიმართულებითაც მუშაობს. 2022 წელს კომპანიამ POSTRED Academy წარადგინა. აკადემიის სასწავლო პროგრამა აერთიანებს ისეთ კურსებს, როგორებიცაა: ხმის დიზაინი და მუსიკა ვიზუალური მედიისთვის.
„POSTRED Academy-ის ეგიდით ჩვენი გუნდი კიდევ უფრო აქტიურად მუშაობს, რომ პოსტპროდუქციისა და ზოგადად კინოინდუსტრიის სფეროში არსებული თანამედროვე პროფესიები პოპულარული გახადოს. გვინდა, კიდევ უფრო მეტ ადამიანს დავანახოთ, რომ ხელოვნების კომერციალიზაცია და შემოქმედების პროფესიად ქცევა თანამედროვე ეპოქაში სრულიად რეალურია. ვაპირებთ, ვორკშოპების ფარგლებში რაც შეიძლება მეტ ახალგაზრდას და დაინტერესებულ ადამიანს შევხვდეთ. შეხვედრებს ვგეგმავთ როგორც თბილისში, ასევე – რეგიონებში. შეხვედრების მიზანი ჩვენს სფეროში არსებული პროფესიული და კარიერული შესაძლებლობების შესახებ ცნობადობის ამაღლებაა.“ – ბესო კაჭარავა
