19-26 სექტემბერს ბათუმი საერთაშორისო არტ-ჰაუს კინოფესტივალს, BIAFF 2026-ს უმასპინძლებს. წელს BIAFF 20 წლის იუბილეს აღნიშნავს და მაყურებელს განსაკუთრებულ პროგრამას, საჯარო მასტერკლასებს, პრესკონფერენციებსა და საინტერესო კინოშეხვედრებს შესთავაზებს.
BIAFF-ის გალა-ჩვენებები და მთავარი საზეიმო ღონისძიებები ბათუმის დრამატულ თეატრში გაიმართება, ძირითადი პროგრამა კი Cavea Grand Mall-ში იქნება წარმოდგენილი. განსაკუთრებული ადგილი ფესტივალის ღია ცის ქვეშ გამართულ ჩვენებებს დაეთმობა, რომლებიც კინოს ქალაქის საჯარო სივრცეებში გადაიტანს.
ფესტივალის ერთ-ერთი მთავარი ღია კინოლოკაცია „ივერია ბიჩი“ იქნება. 21-25 სექტემბერს, ყოველ საღამოს, 20:00 საათზე, ზღვის პირას, მზის ჩასვლის ფონზე, მაყურებელს ორი განსხვავებული ფილმის ნახვის შესაძლებლობა ექნება.
„ივერია ბიჩის“ პროგრამის განსაკუთრებული ნაწილი ქართული მუნჯი კინოს კლასიკის ჩვენებებია, რომლებსაც ცოცხალი მუსიკალური აკომპანემენტი გააფორმებს. მაყურებელი იხილავს ალექსანდრე წუწუნავას „ვინ არის დამნაშავე?“ და კოტე მარჯანიშვილის „გოგი რატიანს“.
დაარსებიდან 20 წლის შემდეგ, BIAFF საქართველოში ერთ-ერთ მნიშვნელოვან საერთაშორისო კულტურულ მოვლენად და შავი ზღვის რეგიონში დამოუკიდებელი კინოს მნიშვნელოვან შეხვედრის ადგილად ჩამოყალიბდა.
ბათუმში დაფუძნებული ფესტივალი თანამედროვე კინოსა და ქართული კინემატოგრაფიის მემკვიდრეობას აერთიანებს.
BIAFF 2026-ის სრული პროგრამა და ფესტივალის სიახლეები იხილეთ ვებგვერდზე – www.biaff.ge
ბილეთების შეძენა შესაძლებელია tkt.ge-ის პლატფორმაზე.
