სტუდია „ფანტასმაგორიას“ ანიმაციურმა ფილმმა „ელენე დარიანმა“ ორწლიანი საფესტივალო მოგზაურობა მნიშვნელოვანი გამარჯვებით დაასრულა. ვენეციის არსენალში გამართული თანამედროვე ხელოვნების საერთაშორისო კონკურსის, Arte Laguna Prize-ის მე-20 გამოცემის ჟიურიმ ფილმი მთავარ გამარჯვებულად დაასახელა. კონკურსის ფინალურ ეტაპზე მსოფლიოს სხვადასხვა ქვეყნიდან შერჩეული დაახლოებით 240 არტისტი მონაწილეობდა. გამარჯვებულს 10 000 ევროს ოდენობის ფულადი პრიზი გადაეცა, რომელსაც „ფანტასმაგორიას“ გუნდი ახალი ანიმაციური ნამუშევრის წარმოებას მოახმარს.
„ელენე დარიანის” ორწლიანი საფესტივალო ცხოვრება ყველაზე დიდი ჯილდოთი დავასრულეთ. მათ ჩვენი სათქმელი ინტერპრეტაციების გარეშე გაიგეს და დაგვინახეს. ელენე დარიანის პოეზია, როგორც ცალმხრივი და შეუძლებელი სიყვარულის სიმბოლო, რომელიც რეალურ ცხოვრებაში არასოდეს მატერიალიზდა და პოეზიაში მარადიული სიცოცხლე ჰპოვა.” – აღნიშნავს „ფანტასმაგორიას” სტუდიის ერთ-ერთი დამფუძნებელი ელენე თავაძე.
გუნდისთვის „ელენე დარიანის“ შექმნა სხვადასხვა სახელოვნებო დარგის გაერთიანების და შემოქმედებითი ჯგუფის ინდივიდუალური ხედვების თავმოყრის პროცესი იყო.
„თოჯინური ანიმაცია არც მხოლოდ ანიმაციაა და არც მხოლოდ კინო, ის ხელოვნების ყველა დარგს აერთიანებს, სადაც უამრავი ადამიანის სული საკუთარი ხელით პოულობს შვებას. ასეთი იყო „ელენე დარიანის“ შექმნა „ფანტასმაგორიას“ დიდი გუნდისთვის: ბევრი შრომითა და წვალებით, ორწლიანი ღამისთევებითა და მუდმივად გაუკვალავში სრიალით, ჩვენ მაინც შევძელით და მაყურებლამდე მივიტანეთ „ელენე დარიანის“ არსი – მიზანდასახულობით, შეუპოვრობით, იდეისა და ერთმანეთის ერთგულებით, უზარმაზარი სიყვარულით.“ – ელენე თავაძე.
ფილმის მხატვრული სამყაროს შექმნისას განსაკუთრებული ყურადღება დაეთმო მე-20 საუკუნის დასაწყისის ქართულ არქიტექტურასა და ჩაცმულობის სტილს. ამავე ეპოქის მუსიკალური ნაწარმოებები კი ანიმაციის ემოციურ და პოეტურ ატმოსფეროს განსაზღვრავს. ავტორების თქმით, მუსიკამ მნიშვნელოვანი როლი შეასრულა დარიანის პოეზიისა და მისი მთავარი თემის – ცალმხრივი სიყვარულის ეკრანიზაციაში.
„ელენე დარიანის“ საუნდტრეკში გამოყენებულია ია (ილია) კარგარეთელის „შენ გეტრფი მარად“ და ვანო სარაჯიშვილის ორი ნაწარმოები: „ისევ შენ, და ისევ შენ“ და „ვარსკვლავო“. სიმღერისთვის „ისევ შენ, და ისევ შენ“ მულტიმედია არტისტმა და მუსიკოსმა ირაკლი მარგიშვილმა საკუთარი ინერპრეტაციით ორიგინალური ვერსია შექმნა.
„ფილმის წარმოების პროცესში ირაკლი თეატრალური უნივერსიტეტის ხმის რეჟისურის სტუდენტი იყო და ხმის დიზაინის მიმართულებით გარკვეულწილად ახალბედაც გახლდათ. მისმა მუსიკალურმა გემოვნებამ და გამოცდილებამ, ვფიქრობთ, დარიანს თანამედროვე მუსიკალური ხელწერაც შემატა. მსახიობების მიერ წაკითხული ლექსებისა და ელექტრონული მუსიკის იმპროვიზაციის საფუძველზე მან სიურრეალისტური სცენის ხმოვანი რიგი შექმნა, რომელშიც პაოლო და ელენე უდაბნოში ერთმანეთს ემშვიდობებიან.“ – ელენე თავაძე.
გარდა ამისა, ფილმში ია (ილია) კარგარეთელის „შენ გეტრფი მარად“ ორიგინალური საფორტეპიანო შესრულებით ჟღერს. კომპოზიციის მუსიკალურ გაფორმებაზე ცირა ბზიაშვილმა იმუშავა, ხოლო ალექსანდრე რატიანმა რომანსისთვის გიტარის იმპროვიზაცია შექმნა.
საერთაშორისო აღიარებისა და ვენეციის ჯილდოს შემდეგ, მაყურებელისთვის „ელენე დარიანი“ Youtube-ზე 11 დეკემბრიდან გახდება ხელმისაწვდომი.
