2023 წლის პირველ მარტს მუსიკალური დაჯილდოება, სახელწოდებით Billboard Women in Music Awards გაიმართება. ცერემონიაზე Billboard ჯილდოს იმ ქალ არტისტებს გადასცემს, რომლებიც თანამედროვე მუსიკალურ ინდუსტრიას განსაზღვრავენ.
2023 წლის ცერემონიას „ემის“ მფლობელი მწერალი და მსახიობი, კუინტა ბრანსონი წაიყვანს. ღონისძიება ლოს ანჯელესში მდებარე YouTube Theater-ში ჩატარდება. ლანა დელ რეი, კიმ პეტრასი, TWICE, ბეკი ჯი, Doechii, აივი ქვინი, Latto, ლეინი უილსონი – ეს იმ ქალი არტისტების ჩამონათვალია, რომლებსაც Billboard Women in Music Awards-ზე სხვადასხვა კატეგორიაში დააჯილდოებენ.
სხვა არტისტების და ცერემონიაზე გამომსვლელი შემსრულებლების ვინაობას დაჯილდოების ორგანიზატორები მოგვიანებით დაასახელებენ. ცერემონიის სპონსორები არიან American Express, Honda, Mugler და Nationwide.
„მოხარული ვართ გამოვკვეთოთ ის წამყვანი არტისტები, რომლებიც სხვადასხვა ჟანრში თანამედროვე ჟღერადობას განსაზღვრავენ და ქალ მუსიკოსებს გზას უხსნიან.“ – აღნიშნა Billboard-ის საგამომცემლო ხელმძღვანელმა, ჰანა კარპმა. როგორც მან განაცხადა, Billboard Women in Music Awards-ის წლევანდელი ცერემონია განსაკუთრებული საღამო იქნება.
დაჯილდოებაზე დასასწრები ბილეთები საჯაროდ ხელმისაწვდომია და ღირებულება 85-დან 275 დოლარამდეა.
Billboard Women in Music Awards ონლაინ არხების მეშვეობით პირდაპირ რეჟიმში გადაიცემა. პირდაპირ ეთერთან დაკავშირებულ დეტალებს ორგანიზატორები მოგვიანებით გამოაცხადებენ.
