„გრემის“ მუსიკალურ დაჯილდოებამდე ორი დღით ადრე, „ხმისჩამწერმა აკადემიამ“ Special Merit Awards-ის ცერემონია გამართა. Special Merit Awards-ზე მუსიკალური ინდუსტრიის დამსახურებულ არტისტებსა და ჯგუფებს საპატიო ჯილდოები გადაეცათ. ცერემონია ლოს ანჯელესში, Wilshire Ebell Theater-ში ჩატარდა.
აღსანიშნავია, რომ Special Merit Awards მოკრძალებული და ნაკლებად ხმაურიანი ცერემონიაა, რომელსაც მცირე აუდიტორია ესწრება. დაჯილდოებაზე „ხმისჩამწერი აკადემია“ არტისტებს ისეთ ნომინაციებში აჯილდოებს, როგორებიც არის: განსაკუთრებული მიღწევები, მუსიკალური განმანათლებლის ჯილდო, რწმუნებულის ჯილდო და ტექნიკური გრემის საპატიო ჯილდო.
შემოქმედებით მოღვაწეობაში განსაკუთრებული მიღწევებისათვის ნენსი და ენ უილსონები დაჯილდოვდნენ. 1974 წელს დებმა ჯგუფი, სახელწოდებით Heart ჩამოაყალიბეს. როგორც ნენსი უილსონმა აღნიშნა, როდესაც Heart-ს ქმნიდნენ, უნდოდათ, რომ ის The Beatles-ის მსგავსი მნიშვნელობის მუსიკალური პროექტი ყოფილიყო – „მათზე დაქორწინება არ გვსურდა, არც ის გვინდოდა, რომ მათი მეგობარი გოგონები გავმხდარიყავით. გვსურდა, თავად The Beatles ვყოფილიყავით“.
Special Merit Awards-ის ცერემონიაზე რამდენიმე არტისტმა და პროდიუსერმა ჯილდო მიიღო რასობრივ და გენდერულ გამოწვევებთან გამკლავებისათვის.
განსაკუთრებული მიღწევების გამო ჯილდო ასევე გადაეცა The Supremes-ს. გასული საუკუნის 60-იან და 70-იან წლებში ჯგუფმა შეძლო და მუსიკალურ გულშემატკივრებს შორის ის რასობრივი ბარიერი დაანგრია, რომლის მეშვეობითაც თეთრი და შავი ფანები ყველა კულტურულ სივრცეში ერთმანეთისგან განცალკევებული იყვნენ.
განსაკუთრებული მიღწევების კატეგორიაში დაჯილდოვდა Nirvana. ჯილდოს მისაღებად აუდიტორიის წინაშე ჯგუფის წევრი, კრისტ ნოვოსელიჩი წარდგა. მას სცენაზე დეივ გროლი შეუერთდა. ნოვოსელიჩმა თავის სიტყვაში აღნიშნა, რომ შეტყობინებებს სხვადასხვა ქვეყანაში მცხოვრები ახალგაზრდა მსმენელებისაგან იღებს. მუსიკოსის თქმით, ეს იმას ნიშნავს, რომ ახალი თაობა კვლავაც უსმენს Nirvana-ს მუსიკას.
Special Merit Awards-ზე ჯილდო გადაეცა რეპერ Slick Rick-ს. Slick Rick-ს ჯილდო ვეტერანმა პროდიუსერმა, ლაიორ კოენმა გადასცა. აღსანიშნავია, რომ კოენი ამჟამად YouTube-ის მუსიკალური მიმართულების ხელმძღვანელია.
Special Merit Awards-ის ცერემონიამდე, „ხმისჩამწერმა აკადემიამ“ განაცხადა, რომ დაჯილდოებაზე წარადგენდნენ სიმღერას, რომელმაც სოციალურ ცვლილებებს ხელი შეუწყო. მიუხედავად ამისა, Special Merit Awards-ის მსვლელობისას ეს კომპოზიცია არ დასახელებულა. მოსალოდნელია, რომ სიმღერას 2023 წლის „გრემის“ მუსიკალური დაჯილდოების ცერემონიაზე გამოაცხადებენ.
იხილეთ არტისტებისა და ჯგუფების სრული სია, რომლებიც 2023 წლის Special Merit Awards-ის ცერემონიაზე დაჯილდოვდნენ:
ჯილდო განსაკუთრებული მიღწევებისათვის:
The Supremes
Nirvana
ენ უილსონი და ნენსი უილსონი
ნაილ როჯერსი
Slick Rick
ბობი მაკფერინი
მა რეინი
რწმუნებულის ჯილდო:
ჯიმ სტიუარტი
ელის მარსალისი
ჰენრი დილცი
ტექნიკური გრემის საპატიო ჯილდო:
AES
დოქტორი ენდი ჰილდებრანდი
მუსიკალური განმანათლებლის ჯილდო:
პამელა დოუსონი
