Spotify-ის მონაცემებით, The Weeknd-მა რეიტინგების რეკორდულ მაჩვენებელს მიაღწია.
„ოფიციალურად, 27 თებერვალს The Weeknd სტრიმინგ სერვის Spotify-ის ისტორიაში პირველი არტისტი გახდა, რომელსაც ერთ თვეში 100 მილიონი მსმენელი ჰყავს.“ – ვკითხულობთ Spotify-ის ოფიციალურ Twitter-სა და Instagram-ზე გამოქვეყნებულ პოსტებში.
100 მილიონი თვიური მსმენელი საკმაოდ შთამებჭდავი მაჩვენებელია და ამ მონაცემებით, The Weeknd-მა Spotify-ის ყველა მოწინავე არტისტი ჩამოიტოვა. ამჟამად, Drake-ის თვიური მსმენელების რაოდენობა 68,6 მილიონია, ტეილორ სვიფტის – 80,3 მილიონი, ხოლო მაილი საირუსის ყოველთვიური მსმენელების რიცხვმა 82,5 მილიონს მიაღწია.
სტრიმინგ სერვისზე The Weeknd-ის ეს წარმატება კომპოზიციის – Die for You გარემიქსებული ვერსიის გამოქვეყნებას მოჰყვა. არტისტი ამ ტრეკს არიანა გრანდესთან ერთად ასრულებს. აღსანიშნავია, რომ The Weeknd-მა სხვადასხვა ჰიტის რემიქსი არიანა გრანდესთან დუეტში რამდენჯერმე ჩაწერა.
თებერვალში, HBO Max-ზე The Weeknd-ის კონცერტის სპეციალური ჩანაწერის პრემიერა შედგა. The Weeknd: Live at SoFi Stadium – ასე ჰქვია ფილმს და ის კალიფორნიაში, SoFi Stadium-ზე 2022 წელს გამართულ კონცერტს ასახავს. კანადელმა არტისტმა განაცხადა, რომ სწორედ ამ მუსიკალური დოკუმენტური ნამუშევრით დაიხურა 2022 წლის ალბომის ფარგლებში მიმდინარე პროექტების ციკლი.
აღსანიშნავია, რომ მალე მაყურებელი The Weeknd-ს მსახიობის ამპლუაშიც იხილავს. წელს HBO-ზე სერიული დრამა – The Idol გამოვა, რომელშიც ერთ-ერთ მთავარ როლს სწორედ The Weeknd ასრულებს. გარდა პერსონაჟის განსახიერებისა, მუსიკოსი სერიალის ერთ-ერთი შემქმნელიც არის. მან პროექტზე Euphoria-ს რეჟისორ სემ ლევინსონთან და სცენარისტ რეზა ფაჰიმთან ერთად იმუშავა. სერიალში ლილი-როუზ დეპი, ტროი სივანი, BLACKPINK-ის ჯენი და სხვა ვარსკვლავები მონაწილეობენ.
ნახეთ პოსტი, რომელიც Spotify-მ The Weeknd-ის შესახებ გამოაქვეყნა:
It’s official: On February 27, The Weeknd became the first artist in Spotify History to reach 100 Million monthly listeners 🏆 pic.twitter.com/YwslzheIDN
— Spotify (@Spotify) February 27, 2023
