მუსიკოსმა Lua–მ ახალი ახალი სინგლი, სახელწოდებით Aquarium გამოუშვა. არტისტმა ეს კომპოზიცია სახლში ჩაწერა. აღსანიშნავია, რომ Aquarium-ის პროდიუსერი თავად Lua არის. ელექტრო გიტარის პარტირება მუსიკოს გიორგი ხვიტიას ეკუთვნის, ხოლო სინგლისათვის ვიზუალური ნამუშევარი ლისა ღლონტმა შექმნა.
Lua, მუსიკოსი:
„Aquarium ექვსი წლის წინ დავწერე, თებერვალში კი ჩავწერე. სიმღერის შინაარსზე არ ვსაუბრობ, რადგან ის ძალიან პერსონალურია. სინგლის არტვორქზე პატარა ასოებია გამოსახული – ეს ჩემი უახლოესი მეგობრის, ლისა ღლონტის ნამუშევარია. ეს ანბანი სწორედ ლისამ შექმნა და ერთგვარი საიდუმლო დამწერლობაა. ამ ანბანით სწორედ სიმღერის ისტორია წერია, თუმცა, მისი წაკითხვა არავის შეუძლია.“
როგორც Billboard საქართველოსთან საუბრისას Lua აღნიშნავს, სიმღერის სახლში ჩაწერამ და არანჟირებაზე მუშაობამ დიდი შემოქმედებითი თავისუფლება მისცა.
„აქამდე არ მქონდა საშუალება, რომ სახლში შესაბამისი სტუდიური გარემო მომეწყო და თავად მემუშავა სიმღერის ჩაწერაზე. როცა ეს შევძელი, აღმოვაჩინე, რომ საკმაოდ საინტერესო პროცესია – მეტი შემოქმედებითი თავისუფლება მომცა და პროცესიც უფრო ინსპირაციული გახდა. ამ დროს შენს მუსიკასთან მარტო ხარ, ყველა გამოწვევას თავად უმკლავდები და ეს ჩემთვის ძალიან საინტერესო პროცესი აღმოჩნდა.“ – Lua.
მალე Lua ახალ EP ალბომს გამოუშვებს. Fuck – ასე ჰქვია დაანონსებულ EP-ის და ის სამ სინგლს აერთიანებს. სწორედ ერთ-ერთი მათგანია Aquarium.
„სამივე სინგლი საავტოროა. სიმღერები ჟღერადობით განსხვავდება, თუმცა ისინი ძალიან პერსონალური შინაარსის და ისტორიის მატარებელია.” – Lua.
