ჯაზის საერთაშორისო დღესთან დაკავშირებით, 30 აპრილს თბილისის სახელმწიფო კონსერვატორიის დიდ დარბაზში არი ოენიგის ტრიოს კონცერტი გაიმართა. არი ოენიგი ჯაზის შემსრულებელი ამერიკელი დრამერი და კომპოზიტორია, რომელმაც მსოფლიოში გაითქვა სახელი. არი ოენიგის ტრიო ენერგიული შესრულებით, ჰარმონიულობითა და ტემპით ხასიათდება. ტრიო მსოფლიოს სხვადასხვა ქვეყანაში მოგზაურობს და მათი კონცერტები ანშლაგით მიმდინარეობს. არი ოენიგის გარდა, ტრიოს წევრები ბასისტი მეთ პენმანი და პიანისტი ნიტაი ჰერშკოვიცი არიან. მუსიკალური კოლექტივი კონსერვატორიის დიდი დარბაზის სცენაზე, ევროპული საკონცერტო ტურნეს ფარგლებში წარდგა. აღსანიშნავია, რომ ამ წელს ეს მუსიკალური საღამო ტრიოს ტურის ფინალური კონცერტი იყო.
კონცერტის დაწყებამდე „Billboard საქართველო“ არი ოენიგს ესაუბრა. მუსიკოსმა აღნიშნა, რომ მისთვის თბილისის ისტორიული მუსიკალური სივრცის სცენაზე გამოსვლა განსაკუთრებული მნიშვნელობის მატარებელია.
არი ოენიგი:
„ჩემთვის დიდი პატივია, რომ მომეცა საშუალება თქვენს ქვეყანაში ჩამოვსულიყავი და ჩემს ჯგუფთან ერთად, საკუთარი მუსიკალური შემოქმედება მსმენელისათვის წარმედგინა. ამ შენობას, ამ სივრცეს დიდი ისტორია და რეპუტაცია აქვს, ამიტომ ამ სცენაზე გამოსვლა ჩემთვის განსაკუთრებული მნიშვნელობის მატარებელია. მიხარია, რომ შემიძლია, მსმენელს ჯაზის ჩვენებური ხედვა გავუზიარო. რაც შეეხება საქართველოს, მინდა აღვნიშნო რომ ამ ქვეყანაში ეს ჩემი პირველი სტუმრობაა. ძალიან ვისიამოვნე ქალაქის დათვალიერებით, ძველი უბნების მონახულებით, ტრადიციული კერძების დაგემოვნებით და ვაპირებ, კონცერტის შემდეგ კიდევ უფრო მეტი საინტერესო ადგილი ვნახო და აქ მცხოვრები ხალხი უფრო ახლოს გავიცნო.“
თბილისის სახელმწიფო კონსერვატორია, როგორც კლასიკური მუსიკის საგანმანათლებლო ისტორიული სივრცე, მრავალი წელია ზრუნავს აუდიტორიისათვის საერთაშორისო მუსიკოსების შემოქმედების გაცნობაზე. არი ოენიგის ტრიოს კონცერტიც სწორედ ამ ტრადიციის გაგრძელებაა. როგორც თბილისის სახელმწიფო კონსერვატორიის დიდი დარბაზის დირექტორი პავლე კვაჭაძე „Billboard საქართველოსთან“ საუბრისას ამბობს, ჯაზის დღის კონსერვატორიაში ამგვარად აღსანიშნავად, ტრიოს სპეციალურად სთხოვეს კონცერტი სწორედ ამ თარიღისათვის დაემთხვია, რაზეც მუსიკალური კოლექტივი დასთანხმდა. აღსანიშნავია, რომ არი ოენიგის საქართველოში ვიზიტმა, არამხოლოდ კონცერტი, არამედ მასტერკლასიც მოიცვა.
არი ოენიგის ტრიოს კონცერტი საქართველოში ამერიკის საელჩოს მხარდაჭერით ჩატარდა.
გაეცანით არი ოენიგის და მისი ტრიოს მუსიკალურ შემოქმედებას არტისტის ოფიციალურ არხზე.
