2023 წლის „ევროვიზიის სიმღერის კონკურსის” გამარჯვებული შვედეთი გახდა. შვედეთის წარმომადგენელმა მონაწილემ, 39 წლის Loreen-მა საკონკურსო სიმღერის – Tattoo-ს შესრულებით 583 ქულა დაიმსახურა. Loreen-მა ევროვიზიის კონკურსში მეორედ გაიმარჯვა. პირველად ამ ტიტულის მფლობელი 2012 წელს გახდა. ამ შედეგით, Loreen ევროვიზიის ისტორიაში პირველი ქალი მუსიკოსია, რომელმაც კონკურსი ორჯერ მოიგო.
„ერთადერთი რამ, რასაც ახლა ვგრძნობ, არის დიდი სიყვარული. ვერც კი დამესიზმრებოდა ის, რაც ახლა მოხდა.“ – თქვა მომღერალმა შოუს შემდეგ გამართულ პრეს კონფერენციაზე.
2023 წლის „ევროვიზიის სიმღერის კონკურსი” გაერთიანებულ სამეფოში, დიდ ბრიტანეთში ჩატარდა. შოუზე მიწვეული არტისტის ამპლუაში აუდიტორიის წინაშე წარდგა Queen-ის დრამერი, როჯერ ტეილორი. სატელევიზიო ეთერით კი, წინასწარი დაანონსების გარეშე, უელსის პრინცესის, ქეით მიდლტონის წინასწარ ჩაწერილი ვიდეო აჩვენეს. ვიდეოში ქეითი პიანინოზე უკრავს.
რაც შეხება კონკურსის ტრიუმფატორ ქვეყანას, შვედეთისათვის ეს მეშვიდე გამარჯვებაა. პირველი შვედი წარმომადგენელი, რომელმაც „ევროვიზიის სიმღერის კონკურსი” მოიგო, ABBA იყო. ჯგუფმა კონკურსის გამარჯვებულის ტიტული 1974 წელს, კომპოზიციით Waterloo მოიპოვა.
