ავსტრალიელი მუსიკოსის Chet Faker-ის ნამდვილი სახელია ნიკოლას ჯეიმს მერფი. სოულის, ტრიპ-ჰოპის, დაუნტემპოს და ელექტრონიკის სინთეზი ის მუსიკალური ჟანრებია, სადაც Chet Faker-ის შემოქმედებითი მოგზაურობა იღებს სათავეს.
არტისტმა პირველად მსმენელის ყურადღება სინგლით No Diggity მიიპყრო, რომელიც ცნობილი ჯგუფის Blackstreet-ის ქავერია. მან 2012 წელს სადებიუტო EP სახელწოდებით Thinking in Textures გამოუშვა, და მუსიკის კრიტიკოსების დიდი მოწონება დაიმსახურა. მას შემდეგ Chet Faker-მა მუსიკალურ ინდუსტრიაში ადგილი წარმატებულად დაიმკვიდრა.
სადებიუტო ალბომი Built on Glass , Chet Faker-მა 2014 წელს გამოსცა და რამდენიმე ჯილდოც დაიმსახურა, მათ შორის ავსტრალიური ARIA Charts-ის პირველი ადგილი დაიკავა. ალბომში შესულია ისეთი ცნობილი სიმღერები როგორიცაა: Talk Is Cheap და Gold, სადაც მუსიკოსის ვოკალური მონაცემები და ინოვაციური განსხვავებული სტილი, ნათლად არის წარმოჩენილი.
2016 წელს Chet Faker-მა კარიერაში მნიშვნელოვანი ცვლილებები შეიტანა და სოციალური მედიის საშუალებით განაცხადა, რომ მუსიკალური კარიერის გაგრძელება ნამდვილი სახელით – ნიკოლას მერფით სურს. არტისტმა ამ ნაბიჯით შემოქმედებით ავთენტურობას გაუსვა ხაზი. 2017 წელს მან ალბომი Missing Link სწორედ ნიკოლას მერფის სახელით გამოსცა.
1 ივლისს, Mono Hall-ის თბილისის სეზონის დახურვისას „ცისკარი გარდენში“, Chet Faker მსმენელის წინაშე Dj Set-ით წარდგა, სადაც ადგილობრივი სცენის გამორჩეულმა არტისტებმა Haverdi და meANDyou მასპინძლობა გაუწიეს.
„Chet Faker-ის ივენთი ცოტა უცნაურად დაიგეგმა. ორ წელიწად ნახევარზე მეტია, რაც მის დაჯავშნას ვცდილობდით. ამ ღონისძიებაზე ცოტა სხვანაირად მოხდა ყველაფერი. შანსი მოგვეცა და მოკლე დროში დავაორგანიზეთ. ძალიან ბედნიერები ვართ, რომ ავსტრალიელ არტისტს საქართველოში ვუმასპინძლეთ და შევეცდებით კიდევ ერთხელ Live set-ით ჩამოვიყვანოთ. არტისტი თვითონ, ღონისძიებით და ქართველი მსმენელით ძალიან კმაყოფილია. რაც შეეხება ქართველ არტისტებს, ამ ღონისძიებაზე პირველად ვითანამშრომლეთ Haverdi-თან, ვფიქრობ ძალიან გაამართლა და კიდევ ბევრჯერ ძალიან კარგ შედეგს დადებს. Haverdi ბათუმში დღეს ჩვენთან Killages გამოსვლამდე დაუკრავს. არტისტ meANDyou-თან წლებია ვთანამშრომლობთ, ადრეც სანამ დუო პროექტი ჰქონდა და ახლაც, სოლო პროექტით მისი მუსიკა ჩვენს სეგმენტს ზუსტად ერგება.
სამომავლო პროექტებს და გეგმებს რაც შეეხება, ახლა მთლიანი აქცენტი ბათუმში გვაქვს გადმოტანილი, თბილისში ღონისძიებები მორჩა და აქედან გამომდინარე 100%-ით ბათუმში ვიქნებით გადართული, თუმცა ეს სულაც არ ნიშნავს იმას, რომ თბილისის სეზონისთვის არ ვემზადებით. გახსნისთვის ფაქტობრივად ყველა არტისტი დაჯავშნილია, თუმცა მათ სახელებს ჯერ ვერ გავაჟღერებთ, სანამ ღონისძიება არ დაანონსდება. გვინდა მთლიანობაში ამ ყველაფერს შოკის მომგვრელი ანონსის სახე მივცეთ. გპირდებით, რომ MONO HALL- უფრო მეტად ცოცხალ არტისტებს დაუთმობს სცენას, რადგან ჩვენც ამ მუსიკის მოყვარულები ვართ. გვსურს ამ სფეროს განვითარებაში დიდი წვლილი შევიტანოთ და ჩვენი სცენის საშუალებით ქართველმა მსმენელმა ადგილობრივი თუ უცხოელი არტისტის გაცნობა შეძლოს.“ – დაჩი დგებუაძე, MONO HALL-ის საზოგადოებასთან ურთიერთობის მენეჯერი.
MONO HALL Batumi მუსიკალური ღონისძიებების სეზონს ბათუმში განაგრძობს, სადაც დღეს მსმენელის წინაშე ჯგუფი Killages წარდგება. 1 ივლისს ჯგუფმა ახალი ალბომი Outcast გამოსცა.
MONO HALL Batumi მუსიკის მოყვარულებს ზაფხულის განმავლობაში ბევრ სიახლეს და საინტერესო მუსიკას ჰპირდება.
