მსოფლიო ტურნეს დასასრულის მოახლოებასთან ერთად ლიზომ გულშემატკივარს გაუმხილა, თუ როგორია მისი განტვირთვა ათასობით ფანის წინაშე ჩატარებული კონცერტის შემდეგ.
მომღერალმა ინსტაგრამზე რამდენიმე ფოტო და ვიდეო ატვირთა სათაურით: „რას აკეთებს ლიზო კონცერტების შემდეგ…” გამოქვეყნებულ ვიდეოში ლიზო კარაოკე ბარშია და რედიოჰედის Creep-ს ასრულებს. მის სიმღერას თან დამსწრე საზოგადოების ოვაციები ახლავს.
ეს არ არის პირველი შემთხვევა, როცა ლიზო რედიოჰედის მიმართ სიყვარულს გამოხატავს. ოქტომბერში Vanity Fair-თან ინტერვიუში ლიზომ გაამხილა, რომ სკოლის პერიოდში ჯგუფის ალბომის OK Computer-ის მიმართ სიყვარულს მალავდა, რადგან მისი მეგობრები უსმენდნენ იმას, რაც რადიოში გადიოდა და მას არ სურდა, რომ დაცინვის ობიექტი გამხდარიყო.
ლიზოს ამჟამინდელი ტურნე მის 2022 წლის ალბომს Special-ს ეძღვნება, რომელშიც შედის ჰიტები 2 Be Loved (Am I Ready) და გრემის მფლობელი About Damn Time, რომელიც ამავდროულად ბილბორდის „ცხელი ასეულის” ლიდერიც გახდა.
