18 სექტემბერს, თბილისის სახელმწიფო კონსერვატორიის დიდ დარბაზში გიორგი გიგაშვილის და Nikala-ს კონცერტი სახელწოდებით „სერიოზული მუსიკა” გაიმართა. „სერიოზული მუსიკა” აკადემიური და ელექტრონული მუსიკის სინთეზია, სადაც კლასიკა თანამედროვეობას შეხვდა. აღსანიშნავია, რომ კონცერტი პერფორმანსის ელემენტებით გამოირჩეოდა – ის ერთგვარი სასცენო ექსპერიმენტის და სახელოვნებო მანიფესტის სახეს ატარებდა. მუსიკალური პროგრამის ძირითადი ნაწილის დაწყების წინ, სპეციალურად მოწყობილ სცენაზე გიორგი გიგაშვილმა წარწერით – „ხელოვნება დამოუკიდებელია და პოლიტიკური“ საკუთარი, როგორც არტისტის დამოკიდებულება კიდევ ერთხელ გამოხატა.
კონცერტზე გაჟღერდა როგორც კლასიკური მუსიკა, ასევე მსოფლიო ჰიტები. პროგრამა მოიცავდა ქართული მუსიკის სახელგანთქმულ ნაწარმოებებსაც.
მუსიკალური საღამოს გახსნაზე აუდიტორიამ გიორგი გიგაშვილის მიმართვა მოისმინა, რომელიც პროექტის წარმდგენი ნაწილი იყო: „წარმოგიდგენთ ჩემი და Nikalaს სავტორო კონცერტს, რომელსაც ჰქვია „სერიოზული მუსიკა“. ეს სერიოზული მუსიკა გახლავთ ბრჭყალებში ჩასმული, რადგან პირდაპირ გეტყვით, რომ არ არსებობს სერიოზული მუსიკა.“
როგორც გიორგი გიგაშვილმა აღნიშნა, არ შეიძლება მუსიკა რაიმე ჩარჩოებში ჩავსვათ და გარკვეულ ჟანრებს სერიოზული, ან არასერიოზული მუსიკის სტატუსი მივანიჭოთ. მუსიკოსის ეს შეფასება საკუთარ გამოცდილებას ეყრდნობა. სწორედ ეს პირადი გამოცდილება გახდა პროექტის მთავარი ინსპირაცია. „სერიოზული მუსიკა” ერთგვარი პასუხია მუსიკის სტერეოტიპულ აღქმაზე.
კონცერტის მსვლელობისას გიორგი გიგაშვილთან და ნიკალასთან ერთად სცენაზე კატო კვარაცხელიაც წარდგა.
მუსიკალურ პროექტს თბილისის სახელმწიფო კონსერვატორიის რექტორი ნანა შარიქაძეც გამოეხმაურა. კონცერტის დასრულების შემდეგ მან სოციალურ ქსელში პოსტი გამოაქვეყნა. „კონცერტი-მანიფესტი თავისუფლებაზე, ნიჭიერებაზე, სილაღეზე, ხელოვნებაზე, არტისტზე, ინდივიდის სათქმელზე, დამოუკიდებელ ხელოვნებაზე…“ – წერს ნანა შარიქაძე.
კონცერტი კომპანია “სარაჯიშვილის“ მხარდაჭერით გაიმართა.
ნახეთ ვიდეო, რომელშიც გიორგი გიგაშვილი საუბრობს კონცერტზე – „სერიოზული მუსიკა“:
