16 ნოემბერს ბრიუსელში ლიზა ბათიაშვილისა და გიორგი გიგაშვილის კონცერტი გაიმართება. ქართველი მუსიკოსები ევროპელი მსმენელის წინაშე ფესტივალ „ევროპალიას” ფარგლებში ბრიუსელის ხელოვნების ცენტრში, Bozar-ში წარდგებიან. კონცერტზე შესრულდება ვაჟა აზარაშვილის, მენდელსონისა და სეზარ ფრანკის ნაწარმოებები. სოციალურ ქსელში ლიზა ბათიაშვილი რეპეტიციის კადრებს აზიარებს, სადაც გიორგი გიგაშვილთან ერთად სწორედ ვაჟა აზარაშვილის ნოქტიურნს ასრულებს.
„ლიზა ბათიაშვილი მისი თაობის ერთ-ერთი ყველაზე წარმატებული მევიოლინეა. მისი გამოჩენა Bozar-ის სცენაზე ყოველთვის ემოციურ კავშირს ქმნის აუდიტორიასთან, რომელიც მოხიბლულია მისი შეუდარებელი მუსიკალურობით. „ევროპალიას” ფარგლებში, რომელიც საქართველოს ეძღვნება, თბილისში დაბადებული ლიზა ბათიაშვილის მოწვევა ძალიან ცხადი არჩევანი იყო. ქართველი მევიოლინე სცენაზე მის თანამემამულესთან, 23 წლის პიანისტ გიორგი გიგაშვილთან ერთად წარდგება, რომელიც 2019 წელს, არც მეტი, არც ნაკლები, თავად მართა არგერიხმა შეამჩნია,” – ვკითხულობთ კონცერტის წარდგენაში.
„ევროპალია” ერთ-ერთი მთავარი ფესტივალია მსოფლიო საფესტივალო რუკაზე. მას ბიენალეს სახე აქვს და ყოველ ორ წელიწადში ერთხელ ერთ კონკრეტულ ქვეყანას ეძღვნება. არჩეული ქვეყანა ოქტომბრიდან იანვრამდე ევროპის წინაშე სხვადასხვა კულტურული ღონისძიებით წარმოჩნდება. წელს „ევროპალიას” ფესტივალი საქართველოს ეძღვნება.
ნახეთ ვიდეო ლიზა ბათიაშვილისა და გიორგი გიგაშვილის რეპეტიციიდან:
