„ისთერნ ფრომოუშენსის” ჯაზ ფესტივალების სერიას ზამთრის სეზონი დაემატა: წელს პირველად, გუდაურში, Winter Jazz გაიმართება. ფესტივალი „კარპე დიემის“ მიმდებარე ტერიტორიაზე ჩატარდება და ორი დღის განმავლობაში – 24 და 25 თებერვალს გაგრძელდება. პროგრამა თერთმეტ არტისტს აერთიანებს, რომლებიც მსმენელს შთამბეჭდავ მუსიკას გაუზიარებენ. საფესტივალო პროგრამას გახსნის „Soulidan“, შემდეგ კი გააგრძელებენ ლეგენდარული არტისტები: Kenny Bobien, Josh Milan, Kaidi Tatham, Dj Spen, Greg Gauthier, Afshin. პირველ საფესტივალო დღეს დაასრულებს ამერიკელი მუსიკოსი Scott Kinsey და მისი ჯგუფი პროექტით „We speak LUNIWAZ“. მუსიკალური კოლექტივი მსმენელს ჯო ზავინულის მუსიკას შესთავაზებს.
რადგან Winter Jazz საქართველოში ყველაზე წარმატებული მუსიკალური პროექტის ახალი შემადგენელი ნაწილია, მოლოდინიც დიდია. აღსანიშნავია ისიც, რომ საქართველოში ზამთრის კურორტზე მსგავსი მასშტაბის მუსიკალური ღონისძიება არ გამართულა.
„Billboard საქართველო” კომპანია „ისთერნ ფრომოუშენსის” თანადამფუძნებელს, გიორგი კერესელიძეს ესაუბრა.
„წლების წინ, როცა თბილისის ჯაზ ფესტივალს უკვე თავისი მყარი რეპუტაცია ჰქონდა, „ბათუმის ჯაზ ფესტივალის“ დაარსებაზე დავიწყეთ ფიქრი. ამ დროს ბათუმით ტურისტების დაინტერესება იზრდებოდა და ამ ფესტივალმა ეს დაინტერესება გარკვეულწილად კიდევ უფრო გააღრმავა. შემდეგ ჯაზ ფესტივალების სერიას საშემოდგომო სეზონზე კახეთი შემოუერთდა და ამ შემთხვევაშიც ამოსავალი წერტილი ტურისტული პოტენციალის ზრდისათვის ხელშეწყობა იყო. წელს, უკვე ზამთრის სეზონიც დავამატეთ, რაც სეზონური სერიების დასკვნით ეტაპად იქცა. ყოველ ფესტივალს თავისი კონცეფცია აქვს, იმის მიხედვით, თუ რა გარემოში ტარდება. Winter Jazz-ის შემთხვევაში მსოფლიოს ზამთრის კურორტებზე გამართული ფესტივალების გამოცდილება გავითვალისწინეთ.” – ამბობს გიორგი კერესელიძე.
როგორც გიორგი კერესელიძე ამბობს, გარემო პირობები და სიცივე განაპირობებს იმას, რომ ინსტრუმენტულ ნაწილზე მეტად ელექტრონული ნაწილი ჭარბობს, თუმცა, ჟანრობრივად პროგრამა მაინც სოულის ირგვლივ ტრიალებს.
„Billboard საქართველოსთან” გიორგი კერესელიძემ „ისთერნ ფრომოუშენსის” სამომავლო გეგმებზეც ისაუბრა და აღნიშნა, რომ კომპანია მსმენელს სიახლეებს მუდმივად შესთავაზებს.
გიორგი კერესელიძე:
„გვექნება დამოუკიდებელი პროექტები, კონცერტები, რომლებიც ფესტივალების სერიის მიღმა ჩატარდება. ამ პროექტებზე დეტალებს მსმენელი ჩვენგან უახლოეს მომავალში შეიტყობს.”
