2024 წლის გრემის დაჯილდოებაზე ტეილორ სვიფტმა ახალი ისტორია დაწერა, როცა რეკორდული, მეოთხე გამარჯვება მოიპოვა წლის ალბომის ნომინაციაში. ამჯერად გამარჯვებული მისი 2022 წლის ალბომი Midnights გახდა.
ჯილდო მომღერალს ლეგენდარულმა სელინ დიონმა გადასცა. პოპვარსკვლავის სცენაზე გამოჩენა მაყურებლისთვის დიდი სიურპრიზი იყო მას შემდეგ, რაც მომღერალს „დაჭიმული ადამიანის სინდრომის“ დიაგნოზი დაუსვეს. „ბედნიერი ვარ აქ ყოფნით და ამას მართლა მთელი გულით ვამბობ,” – აღნიშნა მან სცენაზე.
შესავალი სიტყვის შემდეგ დიონმა წლის ალბომის ნომინაციის გამარჯვებული გამოაცხადა. ჯილდოს მისაღებად სცენაზე სვიფტი პროდიუსერ ჯეკ ანტონოფთან და ალბომის მონაწილე ლანა დელ რეისთან ერთად ავიდა და სიტყვით გამოსვლისას ორივე მათგანს მადლობა გადაუხადა. ანტონოფს მისი ერთ-ერთი საუკეთესო მეგობარი და თაობის საუკეთესო პროდიუსერი უწოდა, ლანა დელ რეის კი წარმატების ზენიტში მყოფი ლეგენდა. „გამიმართლა, რომ გაგიცანი და შენი მეგობარი ვარ,” – მიმართა სვიფტმა ლანას.
მომღერალმა ასევე აღნიშნა, რომ წლევანდელი გრემის ტრიუმფის გამო ემოციების მოზღვავებას გრძნობს, თუმცა ეს მაინც არ ჰგვრის იმხელა ბედნიერებას, როგორსაც მუსიკის კეთების პროცესი. „ჩემთვის ჯილდო მუშაობაა და ახლა ჩემი ერთადერთი სურვილი ის არის, რომ ამ ყველაფრის გაგრძელება შევძლო,” – აღნიშნა მან.
გასულ წლებში სვიფტს ხმის ჩამწერი აკადემიის ჯილდო მოგებული აქვს ალბომებისთვის Fearless (2010), 1989 (2016) და Folklore (2021).
