ლოს-ანჯელესში გამართულ გრემის დაჯილდოებას, რომელიც 4 თებერვალს გაიმართა, არაერთი ცნობილი ადამიანი ესწრებოდა და მათ შორის იყო ამერიკული სატელევიზიო მედიის ვარსკვლავი ოპრა უინფრი. ცერემონიაზე უინფრიმ დაამტკიცა, რომ ის მუსიკის დიდი მოყვარულია, როდესაც თავის გამომწერებს ინსტაგრამზე არაერთი ვიდეო გაუზიარა, სადაც მას კულისებში მუსიკალური ინდუსტრიის ვარსკვლავებთან ერთად ვხედავთ.
ერთ-ერთ ვიდეოში ოპრა ტელორ სვიფტს თბილად ესალმება და ეუბნება, რომ მან ისტორიული გამარჯვება მოიპოვა. ტეილორ სვიფტი პირველი მომღერალი გახდა, რომელმაც საუკეთესო ალბომის ნომინაციაში მეოთხედ გაიმარჯვა და ოპრას ეს ვიდეო სწორედ მისი დაჯილდოვების შემდეგ არის გადაღებული.. ამერიკის ხმის ჩამწერმა აკადემიამ ამჯერად სვიფტის ალბომი Midnights გამოარჩია.
გრემის ცერემონიაზე გადაღებულ კადრებში ოპრამ ასევე სელინ დიონთან შეხვედრა აღბეჭდა. გამოქვეყნებული პოსტის აღწერაში უინფრიმ მომღერალს “ძველი მეგობარი” უწოდა. აღსანიშნავია, რომ დიონი გრემის დაჯილდოებაზე მოულოდნელად გამოჩნდა. მომღერალმა წლის ალბომის ნომინაციაში გამარჯვებული დაასახელა. ეს სელინ დიონისათვის პირველი გამოჩენა იყო მას შემდეგ, რაც 2022 წლის დეკემბერში იშვიათი ნევროლოგიური დაავადების დიაგნოზი დაუსვეს. ამ დიაგნოზის გამო დიონი იძულებული იყო, 2023 წელს დაგეგმილი საკონცერტო ტურნე გაეუქმებინა..
“მათ ვისაც დღეს გრემის დაჯილდოებაზე დასწრება ხვდა წილად, არ უნდა დაავიწყდეს ის უდიდესი სიყვარული და სიხარული, რომელიც მუსიკას ადამიანებისათვის მოაქვს.” – მიმართა აუდიტორიას სელინ დიონმა.
რაც შეეხება ოპრა უინფრის მიერ სოციალურ ქსელში გაზიარებულ მასალას, მან ინსტაგრამზე ასევე გამოაქვეყნა კულისებში გადაღებული ვიდეო, რომელშიც ლენი კრავიცს ესაუბრება.
აღსანიშნავია, რომ გრემის დაჯილდოებაზე განსაკუთრებული პატივი მიაგეს 2023 წელს გარდაცვლილ ლეგენდარულ მომღერალ ტინა ტერნერს. ამასთან დაკავშირებით მუსიკალური ნომერი მომღერალმა ფანტასია ბარინომ შეასრულა. ტინა ტერნერისადმი მიძღვნილი ეს ნომერი სწორედ ოპრამ წარადგინა.
