გიორგი გიგაშვილისა და ნიკალა ზუბიაშვილის ერთობლივი მუსიკალური პროექტი „სერიოზული მუსიკა” მალე ევროპაშიც გაჟღერდება. მუსიკოსებმა ამ ეტაპზე მოწვევა დიდი ბრიტანეთისა და გერმანიისგან მიიღეს. ამის შესახებ სოციალურ ქსელში თავად გიორგი გიგაშვილი წერს და კონცერტების თარიღებს აქვეყნებს.
„სერიოზული მუსიკა” გიორგი გიგაშვილისა და ნიკალა ზუბიაშვილის ექსპერიმენტული პროექტია, რომელსაც ერთგვარი პერფორმანსის სახე აქვს. მისი პრემიერა 2023 წლის 18 სექტემბერს თბილისის სახელმწიფო კონსერვატორიაში შედგა. პროექტი აკადემიური და ელექტრონული მუსიკის სინთეზია და ერთგვარი პასუხია მუსიკის სტერეოტიპულ აღქმაზე. „სერიოზული მუსიკა ბრჭყალებში გახლავთ ჩასმული, რადგან პირდაპირ გეტყვით, რომ არ არსებობს სერიოზული მუსიკა,“ – აღნიშნა Billboard საქართველოსთან საუბარში გიორგი გიგაშვილმა.
