8 მარტს Billboard Georgia Stage-ის მორიგი კონცერტი გაიმართა. „რესპუბლიკის” სცენაზე ამჯერად ბასისტების დედოფლად წოდებული ნიკ უესტი თავის ბენდთან ერთად წარდგა.
ეს არ არის მუსიკოსის პირველი ვიზიტი თბილისში. მას საქართველოსთან მრავალწლიანი ურთიერთობა აკავშირებს, როგორც საქმიანი, ასევე პირადი: მუსიკოსი ქართველ პროდიუსერზე, ნიკა კანდელაკზეა დაქორწინებული. მისალმებისას უესტი სცენაზე შვილთან ერთად გამოვიდა და გულშემატკივარს გააცნო: „ეს ჩემი ნახევრად ქართველი შვილია – ლენი კანდელაკი,” – აღნიშნა მან.
კონცერტზე ბენდმა როგორც საავტორო მუსიკა, ასევე ცნობილი კომპოზიციების ქავერ ვერსიები შეასრულა. ჟანრობრივად მრავალფეროვანი საღამო ნიკ უესტისთვის დამახასიათებელი მუხტითა და ენერგიულობით გამოირჩეოდა, რითაც მუსიკოსმა პირველივე ნოტიდან მოახერხა დარბაზის აყოლიება.
კონცერტის ბოლოს ნიკ უესტმა, ტრადიციულად, სცენაზე ბასზე დასაკრავად დარბაზიდან მსურველი აიყვანა. ამჯერად ეს თავადაც ბასისტი მარიამ კუბანსკი გახდა, რომელთან ერთადაც ბენდმა ტინა ტერნერის Proud Mary შეასრულა.
სხვადასხვა დროს Ნიკ უესტი თანამშრომლობდა ისეთ მუსიკოსებთან, როგორებიც არიან ქუინსი ჯონსი, „პრინცი”, მეისი გრეი, ჯონ მაიერი და სხვები. 2012 წლიდან უესტი თვით „პრინცის” ბასისტი იყო. „საოცარი სცენურობა… ის ისეთივე შთამაგონებელია ჩემთვის, როგორებიც როზი და შეილა იყვნენ,” – ამბობდა მასზე „პრინცი”. „მისი თაობის საკულტო ბასისტი,” – ასე მოიხსენია ის გამოცემამ Rolling Stone. ფრანგულმა Rolling Stone-მა კი ნიკ უესტს ბასისტების დედოფალი უწოდა.
ნახეთ ვიდეო ნიკ უესტის კონცერტიდან:
