მსოფლიო მუსიკალური სცენის გამორჩეული პოპ-როკ ბენდი OneRepublic კოლორადოში 2002 წელს ჩამოყალიბდა. ჯგუფის ვოკალისტი და პიანისტი რაიან ტედერია, ბენდის შემადგენლობაში არიან ასევე ზაკ ფილკინსი (სოლო გიტარა) ბრენტ კაცელი (ბასი, ჩელო), ედი ფიშერი (დრამი) და ბრაიან უილეტი (კლავიში, ვიოლინო).
OneRepublic-ის მუსიკა მრავალფეროვანი მუსიკალური ჟღერადობით გამოირჩევა.
2006 წელს ბენდმა დიდი პოპულარობა მოიპოვა სიმღერით Apologize. 2009 წელს OneRepublic-მა მეორე ალბომი, სახელწოდებით Waking Up გამოსცა. ალბომში ისეთი ჰიტებია შესული, როგორებიცაა All the Right Moves და Good Life.
OneRepublic-ის მესამე სტუდიურ ალბომში, რომლის სახელწოდებაა Native, შესულია მსოფლიო ჰიტად ქცეული სიმღერა Counting Stars.
ბენდს ხუთი სტუდიური ალბომი აქვს გამოცემული.
საქართველოში ჯგუფი OneRepublic პროექტ Starring Georgia-ს ფარგლებში ჩამოვიდა. პროექტი მე-2 წელია, რაც საქართველოს პრემიერ-მინისტრის ინიციატივით და Black Sea Arena-ს ორგანიზებით ტარდება. კამპანიის მთავარი მიზანი კი ქვეყნის პოპულარიზაცია, საქართველოს ტურისტული, ეკონომიკური და კულტურული პოტენციალის გაძლიერებაა.
ცნობისთვის, წელს Black Sea Arena-ს კამპანიის ფარგლებში კიდევ 3 კონცერტია დაგეგმილი. კონცერტების სერია შეკვეთილში 31 მაისს, გერმანული ლეგენდარული ჰარდ-როკ ბენდ Scorpions-ის კონცერტით გაგრძელდება. 28 ივლისს Black Sea Arena-ზე ბრიტანული ჯგუფი Massive Attack გამართავს კონცერტს, ხოლო 18 აგვისტოს Black Sea Arena Front Stage-ზე Brit Award-ის გამარჯვებული ბრიტანლურ ბენდი Jungle წარდგება.
