R&B-ის მომღერალმა და კომპოზიტორმა 5 აგვისტოს, SZA-მ მონრეალში Osheaga-ს ფესტივალზე გამოსვლის შემდეგ, სოციალურ ქსელში პოსტი გაავრცელა, სადაც წერს, რომ ცოტა ხნით საკონცერტო გამოსვლებს წყვეტს.
Yesterday was my last show for a while . Finally bout to get my life together thank u God .
— SZA (@sza) August 5, 2024
„გუშინ ჩემი ბოლო გამოსვლა იყო, დროებით ვისვენებ.” – წერს SZA X-ზე (ტვიტერზე).
SZA-ს 2023 წლიდან მსოფლიო ტურნეში SOS იმყოფება და ჯამში 63 შოუ აქვს გამართული. ბოლო გახმაურებული კონცერტები SZA-ს ჩიკაგოს Lollapalooza-სა და დიდი ბრიტანეთის Glastonbury-ის ფესტივალებზე ჰქონდა, მისი უკანასკნელი გამოსვლა კი Osheaga-ში გაიმართა.
მიუხედავად კონცერტების შეწყვეტისა SZA-ს გულშემატკივრები ახალი სიმღერების ნაკლებობას არ უნდა უჩიოდნენ. Lollapalooza-ში გამართული კონცერტის დროს არტისტმა ერთი გამოუქვეყნებელი სიმღერა, Cry Baby შეასრულა.
მუსიკოსმა ასევე ახალი პროექტი დააანონსა, რომლის სახელწოდებაა Lana:
„ახალი პროექტი Lana ჩემგან მეტ დროს იმსახურებს, ეს არის პროექტი, რომლის მსგავსიც აქამდე არ მოგისმენიათ“ – წერდა არტისტი X-ზე.
SZA-მ ასევე Paramore-თან პოტენციურ თანამშრომლობაზეც ისაუბრა, ცოტა ხნის წინ კი თანამემამულე არტისტის მიმართ აღფრთოვანება ვერ დამალა და Lollapalooza-ზე ჩაპელ როანის გამოსვლა განსაკუთრებულად აღნიშნა.
„იგი მაიძულებს, მუდმივად გავაგრძელო ახალი მუსიკის მოსმენა“ – წერდა SZA.
SZA-ს მეორე ალბომი, რომლის სახელწოდებაა, SOS 2022 წლის დეკემბერში გამოვიდა, ხოლო სინგლმა Kill Bill 2023 წლის აპრილში ბილბორდ 100-ში პირველი ადგილი დაიკავა და მომღრალი, როგორც სოლო შემსრულებელი, ჩარტების ლიდერად დასახელდა. სიმღერამ ტოპ ათეულში რამდენიმე კვირა დაყო.
