16 აგვისტოს ალიშა კისმა ინსტაგრამზე პოსტი გააზიარა. არტისტის თქმით, 2007 წელს გამოსული ჰიტი No One მისი პირველი სოლო ჩანაწერია, რომელმაც ამერიკის ხმის ჩამწერი ინდუსტრიის ასოციაციისგან (RIAA) ბრილიანტის სერტიფიკატი მიიღო.
„ეს სიმღერა ყოველთვის ჩვენთან იყო საჭირო დროს. No One ჯადოსნური სიმღერაა, მადლობა, რომ ის გიყვართ, იმღერეთ ის ხმამაღლა, ჩვენ ბრილიანტის სტატუსი გვაქვს.” – წერს მუსიკოსი სოციალურ ქსელში და სიმღერის ვიდეო კლიპს აქვეყნებს.
ალიშა კისმა ერთი თვის წინ Jay-Z-სთან შესრულებული სიმღერისთვის Empire State of Mind პირველი ბრილიანტის სერტიფიკატი მიიღო. 2024 წლის Tony-ის დაჯილდოებაზე ნიუ-იორკში მათ 2016 წლის შემდეგ პირველად შეასრულეს ერთად ეს სიმღერა.
No One ალიშა კისის მესამე ალბომის, As I Am-ის მთავარი სინგლია. ჰიტ-სიმღერა ბილბორდ 100-ში ხუთი კვირის განმავლობაში იმყოფებოდა. 2008 წლის გრემის დაჯილდოებაზე სინგლი საუკეთესო R&B სიმღერად, ალიშა კისი კი საუკეთესო ქალ R&B-ის შემსრულებლად დასახელდა.
ალიშა კისი ახლახან ბილბორდის 21-ე საუკუნის 25 საუკეთესო პოპ-ვარსკვლავთა სიაში შევიდა. „ძნელი წარმოსადგენია 2000-იანი წლების პირველი ნახევარი მისი სიმღერების გარეშე. ამ პერიოდის მუსიკის განვითარებაში ალიშა კისის წვლილი უდიდესია.” აღნიშნულია განცხადებაში.
