მუსიკოსი მემე ჟორდანია, სასცენო სახელით MEME, და ჰიპ-ჰოპ არტისტი, პროდიუსერი და DJ ლევან ოქროპირიძე, A.K.A Denivarlevi, უკვე ერთი წელია ახალ ალბომზე მუშაობენ. სინგლი I HEAR YOU CALLING MY NAME სწორედ მომავალ ერთობლივ ალბომში შევა. ორწლიანი მუსიკალური პაუზის შემდეგ ეს MEME-სთვის პირველი მუსიკალური პროექტია.
20 აგვისტოს MEME-მ და Denivarlevy-მ კოლაბორაციული პოსტით ინსტაგრამზე სიმღერა I HEAR YOU CALLING MY NAME-ის თიზერ ვიდეო გაავრცელეს. ტრეკი მუსიკალურ პლატფორმებზე 25 აგვისტოს გამოვა.
MEME
„ეს სიმღერა არის ერთ-ერთი ტრეკი ჩვენი ახალი ალბომიდან, რომელზეც მე და ლევანი თითქმის ერთი წელია ვმუშაობთ. ჩვენთვის მნიშვნელოვანი იყო საკუთარი სათქმელის გადმოცემა ამ ალბომში ინდივიდუალურად და ერთად, ამიტომაც კონცეპტუალური სახე აქვს ამ პროექტს. ალბომის იდეა მოიცავს ნოსტალგიას, მოგონებას და ცალმხრივ სიყვარულს, რომელიც ბოლო ერთი წლის მანძილზე გამოვიარე მე. ყველაზე მნიშვნელოვანი ის არის, რომ ალბომის მუშაობის პერიოდში იმ ადამიანთან მოვლენები პარალელურად ვითარდებოდა, ამიტომ კარგად ისახება სიმღერების პროგრესიაში, როდის შემიყვარდა, როდის მიყვარდა და როდის გადამიყვარდა.
მე და ლევანი ბოლო წელიწადნახევარია რაც დავმეგობრდით. ჩვენმა საერთო მეგობარმა გაგამ გადაწყვიტა, რომ ერთმანეთი უნდა გაგვეცნო, რადგან ორივე მუსიკას ვაკეთებდით და ორივე ვიყავით ისეთი ადამიანის ძიების პროცესში, რომელიც მუსიკალურად გაგვიგებდა. მახსოვს, პირველად რომ ვნახე ლევანი, მივხვდი, რომ ეს იყო ის ადამიანი, რომლის დახმარებითაც ჩემი ისტორიის მოყოლა შემეძლო.
ალბომში ვსაუბრობ ჩემ ძველ მუსიკალურ გამოცდილებებზე, მამაჩემის გარდაცვალებაზე, გლოვაზე, სიყვარულზე, იმედგაცრუებაზე, სექსზე და კიდევ უამრავ ემოციაზე, რომელიც საბოლოოდ ამ ერთ წელს მოიცავს.
ამ სიმღერას ჰქვია I HEAR YOU CALLING MY NAME და ჩემთვის ეს ტრეკი ყველაზე კარგად გადმოსცემს იმ მადლიერებას და სიხარულს, რომელსაც მე და ლევანი ვგრძნობდით, როცა ამ ალბომს ვამთავრებდით. გარდა ჩემი პირადი რომანტიკული ასპექტებისა, სადაც კონკრეტული ადამიანისკენ არის მესიჯები მიმართული, ამ ტრეკში კარგად არის გადმოცემული ის, თუ რამდენად მადლიერები ვართ მე და ლევანი, რომ ყველაზე ნიჭიერი და კეთილი ადამიანები გვყავს გარშემო, რომლებიც ჩაერთნენ ამ ალბომის კეთების პროცესში.
ეს ალბომი არის ყველასი.”
25 აგვისტოს I HEAR YOU CALLING MY NAME-ის გამოსვლასთან ერთად სიმღრის მუსიკალური კლიპიც გამოვა, რომელზეც რეჟისორმა ელენე გომელაურმა იმუშავა, ალბომი კი კრეატიული განათლების სტუდია CES-ში ჩაიწერა:
„რაც შეეხება ვიდეოს, ჩემთვის მისაბაძი ადამიანი და ჩემი უნიჭიერესი მეგობარი ელენე გომელაური არის რეჟისორი და გადამღები. ვფიქრობ, რომ ამ ადამიანს ყველაზე კარგად ესმის ამ ალბომის და ძალიან გამიმართლა, რომ ისიც ამ პროექტის ნაწილია. ჩვენ ალბომი ჩავწერეთ CES-ში, რომელიც დაგვეხმარა ეს ოცნება რეალობად გვექცია. დიდი მადლობა სტიას, ქუჯის, ელენეს და მთელ CES ამისთვის.
მახსოვს, ვოკალებს როცა ვწერდით ალბომისთვის, 12 დღეში უნდა მოგვესწრო, რადგან მერე ვიკეთებდი ონკოლოგიურ ოპერაციას და ვეღარ შევძლებდი სიმღერას რამდენიმე თვე, ამას ასევე დაემთხვა რთული პოლიტიკური მდგომარეობა ქვეყანაში, ასე რომ ჩვენი გრაფიკი იყო ასეთი – დილით სამსახური, საღამოს აქციაზე დგომა, ღამე სტუდიაში მუშაობა დილამდე.
ვთვლი, რომ ნამდვილად არ დავზოგეთ თავი, მთელი გული და სული ჩავდეთ ამ სიმღერაში და ალბომში, და ერთი სული მაქვს, როდის დავუბრუნდები მუსიკას 2 წლის შემდეგ პირველად.“
დაელოდეთ 25 აგვისტოს და მოისმინეთ მემე ჟორდანიას და ლევან ოქროპირიძის ერთობლივი ნამუშევარი I HEAR YOU CALLING MY NAME.
