ორწლიანი ქორწინების შემდეგ ჯენიფერ ლოპესმა ბენ აფლეკთან განქორწინება მოითხოვა. ინფორმაციას „ბილბორდი” ადასტურებს.
დოკუმენტში განქორწინების თარიღად 2024 წლის 26 აპრილია მითითებული, თუმცა ხელმოწერილია 20 აგვისტოს – 2 წლის თავზე წყვილის ქორწილიდან, რომელიც ჯორჯიაში შედგა. ჯერჯერობით ლოპესსა და აფლეკს განქორწინება საჯაროდ არ დაუდასტურებიათ.
ჯენიფერ ლოპესისა და ბენ აფლეკის პირველი რომანი 2002 წელს Gigli-ს გადასაღებ მოედანზე დაიწყო. წყვილი დაინიშნა, თუმცა 2003 წელს დაგეგმილი ქორწილი გადაიდო. 2004 წელს კი ისინი ერთმანეთს დაშორდნენ. აფლეკისა და ლოპესის რომანი 2021 წელს განახლდა და ამჯერად ქორწინებით დასრულდა. ხელმოწერიდან ერთი თვის თავზე, 2022 წლის აგვისტოს „ბენიფერმა” ქორწილი ჯორჯიაში, საკუთარ სახლში, ოჯახისა და მეგობრების გარემოცვაში გადაიხადა.
ლოპესისთვის ეს მეოთხე ქორწინება იყო ოხანი ნოას, კრის ჯადისა და მარკ ენტონის შემდეგ. აფლეკი კი მანამდე ჯენიფერ გარნერზე იყო დაქორწინებული.
„არასდროს მიფიქრია, რომ ის და მე ისევ ერთად ვიქნებოდით,” – უთხრა ლოპესმა „ბილბორდს” ბენ აფლეკთან ურთიერთობაზე საუბრისას. „მე უბრალოდ არ მტოვებდა იდეა, რომ რაღაც მშვენიერი მელოდა წინ, მაშინაც კი, როცა ყველაფერი ცუდად იყო. გულის სიღრმეში ყოველთვის მჯეროდა, რომ არ უნდა დავნებებულიყავი. და მაშინ, როცა იმ წერტილამდე მივედი, რომ მარტოც კარგად ვგრძნობდი თავს და ამისთვის ურთიერთობები არ მჭირდებოდა, თითქოს სამყარო გაიხსნა ჩემთვის და მითხრა: „აი, შენ.”
წყვილის ქორწინებაში პრობლემების შესახებ ინფორმაცია გაზაფხულზე გავრცელდა, როცა ბენ აფლეკი არ დაესწრო ლოს-ანჯელესსა და მეხიკოში გამართულ პრემიერებს „ნეტფლიქსის” ფილმისა Atlas, რომელშიც მთავარ როლს ჯენიფერ ლოპესი ასრულებს.
