ლედი გაგა და ხოაკინ ფენიქსი „ჯოკერის” სიქველში Joker: Folie à Deux ცოცხლად მღერიან. ეს გადაწყვეტილება მსახიობებმა თავად მიიღეს იმისთვის, რომ მათი შესრულება ფილმში ისეთივე დაუმუშავებელი და არაპროგნოზირებადი ყოფილიყო, როგორიც მათი პერსონაჟები არიან.
Variety-სთვის მიცემულ ინტერვიუში წყვილმა, რომელიც ჰარლი ქუინისა და ართურ ფლეკის პერსონაჟებს ასახიერებს, გადასაღებ მოედანზე ცოცხლად სიმღერის შესახებ ისაუბრეს:
„ჩვენ არ გვინდოდა ვიბრატო და იდეალური ნოტები,” – აღნიშნა ფენიქსმა. მისი თქმით, მათ სურდათ, ეს შესრულება ემოციებისთვის მიენდოთ, რათა მაქსიმალურად რეალური შედეგი მიეღოთ.
„საკუთარ თავებს კითხვა დავუსვით: „რა იყო საჭირო იმისთვის, რომ როცა ორი ადამიანი შუა საუბარში სიმღერას იწყებს, ეს რეალურად გამოიყურებოდეს?”- დაამატა გაგამ. „საიდან მოდის მუსიკა მაშინ, როცა ის არავის ესმის, პერსონაჟების გარდა? არც ართური და არც ჰარლი პროფესიონალი მომღერლები არ არიან და რატომ უნდა ჩანდეს, თითქოს, არიან… ჩვენ გვსურდა, მოგვეყოლა ამბავი მათი საერთო სიგიჟისა ისე, რომ ეს ნამდვილი ყოფილიყო.”
„ვფიქრობ, ჩვენ ყველას გვაქვს ჩვენი ინტიმური, პერსონალური ურთიერთობა მუსიკასთან და გვაქვს ჩვენი შინაგანი ემოციური ცხოვრების საუნდტრეკი – მუსიკა, რომელიც არავის ესმის, ჩვენ გარდა. სწორედ ამის დაჭერა გვინდოდა ართურისა და ჰარლის შემთხვევაშიც – მათში არსებული მუსიკის.”
Folie à Deux-ს გარდა, ლედი გაგა ახალ, მეშვიდე ალბომზეც მუშაობს, რომლის გამოცემაც მომღერალმა უკვე დააანონსა. ალბომის გამოსვლამდე კი თაყვანისმცემლებს შეუძლიათ გაგას ახალი დუეტი მოისმინონ ბრუნო მარსთან ერთად – Die With a Smile, რომელიც 16 აგვისტოს ვიდეოკლიპთან ერთად გამოქვეყნდა.
