Imagine Dragons-ის დრამერმა დენიელ პლაცმანმა 21 აგვისტოს ოფიციალურად განაცხადა, რომ ბენდს ტოვებს, რათა კინომუსიკას და კომპოზიტორობას უფრო მეტი დრო დაუთმოს.
„წარმოუდგენელი მოგზაურობის შემდეგ ამ საოცარ ბენდს, Imagine Dragons-ს ვემშვიდობები. მინდა, უღრმესი მადლობა გადავუხადო თითოეულ გულშემატკივარს თქვენი ურყევი მხარდაჭერისა და ჩემთან ერთად მუსიკით სიხარულის გაზიარებისთვის. მოხარული ვარ, რომ შევძლებ ჩემი პროექტების თქვენთვის გაზიარებას სამომავლოდ. ბოლო რამდენიმე თვის განმავლობაში ბევრს ვმუშაობდი ამაზე – ჩემს უდიდეს მოწოდებაზე, რომელიც ფილმებისა და თამაშების მუსიკის ავტორობაა. გპირდებით, რომ თქვენ იქნებით პირველი, ვინც ამის შესახებ შეიტყობთ. ასე რომ, თვალი მადევნეთ.“
დენიელ პლაცმანი ათწლეულზე მეტია, რაც ბენდის წევრია. იგი Imagine Dragons 2011 წელს, ბერკლის მუსიკალური კოლეჯის დამთავრებისთანავე შეუერთდა. ამავე წელს ჯგუფმა Interscope Records-თან კონტრაქტი გააფორმა.
Imagine Dragons-ს ახალი დრამერის შესახებ ინფორმაცია ჯერ არ გამოუქვეყნებია.
