დონალდ ტრამპის საარჩევნო კამპანიის ვიდეო, რომელშიც ბიონსეს Freedom იყო გამოყენებული, ტვიტერის ანგარიშიდან წაიშალა.
როგორც „ბილბორდი” ადასტურებს, ბიონსეს ხმის ჩამწერმა ლეიბლმა და მუსიკის გამომცემელმა ტრამპს სიმღერის კამპანიაში გამოყენების შეწყვეტის მოთხოვნა გაუგზავნეს. ინფორმაცია თავდაპირველად Rolling Stone-მა გაავრცელა.
ტრამპის კამპანიის წარმომადგენლის, სტივენ ჩენგის ტვიტერის ანგარიშზე გავრცელებულ ვიდეოში რესპუბლიკელების საპრეზიდენტო კანდიდატი თვითმფრინავიდან სწორედ Freedom-ის ფონზე ჩამოდის. შეგახსენებთ, რომ ცოტა ხნის წინ სიმღერა ოფიციალურად გახდა დემოკრატების საპრეზიდენტო წარმომადგენლის, კამალა ჰარისისა და ვიცე-პრეზიდენტობის კანდიდატის, ტიმ უოლცის კამპანიის მუსიკალური თემა. კომპოზიციის გამოყენების უფლება დემოკრატებს თავად ბიონსეს ნებართვით აქვთ.
ეს არ არის პირველი შემთხვევა, როცა ტრამპს მუსიკოსებთან პრობლემები შეექმნა, საკუთარ კამპანიაში მათი სიმღერების უნებართვოდ გამოყენების გამო. 11 აგვისტოს ისააკ ჰეიესის მემკვიდრეობის ადვოკატმა 2022-2024 წლებში Hold On, I’m Coming-ის უნებართვოდ გამოყენებისთვის ტრამპის წინააღმდეგ სარჩელი შეიტანა. ყოფილ პრეზიდენტს საავტორო უფლებების დარღვევისთვის ასევე დაუპირისპირდნენ The Rolling Stones, რიანა, ადელი და სტივენ ტაილერი.
