მას შემდეგ, რაც „ოაზისმა” დაბრუნება და ახალი ტურნე დააანონსა, ნოელ გალაგერი პირველად გამოჩნდა კამერების წინ. ჯგუფის ფანი სტივ შევარდი გალაგერს ლონდონის ერთ-ერთ მაღაზიაში შეხვდა. შევარდი მაღაზიაში შვილებთან ერთად იმყოფებოდა. საყვარელ მუსიკოსთან შეხვედრის დეტალები კი მან სოციალური ქსელით გაავრცელა.
გამოქვეყნებულ ვიდეოში შევარდი შვილებს ნოელ გალაგერს აცნობს: „ეს მამას ლეგენდარული ბენდია”, რის შემდეგაც საუბარში ბავშვები ერთვებიან. შევარდის ერთ-ერთი ვაჟი გალაჰერს კითხვას უსვამს, თუ რა იყო ძმასთან კონფლიქტის მიზეზი, რაზეც მუსიკოსი სრული სერიოზულობით პასუხობს: „მან ჩემი სათამაშო დათუნია მომპარა.” ბავშვების სიცილის შემდეგ კი აზუსტებს: „არ ვიტყუები. მან ის 1978 წელს მომპარა.”
Bumped into Noel Gallagher Yesterday in the Stone Island Shop in London, boyhood dream to walk into a pub for a Beer with Noel & Liam, trumped that with my children making memories and just hope I can get tickets next year.
— Steve Sheward (@sheward_steve) August 29, 2024
A true gentleman in scholar 💪 pic.twitter.com/BLjzgK7XgZ
შევარდის შემდეგ ვიდეოში კი გალაგერი და ბავშვები უკვე ქუჩას მიუყვებიან და მუსიკოსის შავ როლს როისზე საუბრობენ. „ნამდვილი ჯენტლმენი,” – ასე მოიხსენიებს შევარდი პოსტში გალაგერს.
2009 წლის შემდეგ „ოაზისი” თავის პირველ კონცერტს მომავალ ზაფხულს გამართავს. ბენდმა ხელახალი გაერთიანება და 2025 წლის მსოფლიო ტურნე სულ ცოტა ხნის წინ დააანონსა. ამ ეტაპზე მხოლოდ ინგლისისა და ირლანდიის კონცერტების თარიღებია ცნობილი.
დაანონსებული კონცერტების ბილეთები გასაყიდად 31 აგვისტოს გამოვიდა და მილიონზე მეტი ბილეთი სულ რამდენიმე საათში გაიყიდა. ფანების ნაწილი იმედგაცრუებულია, რადგან საათობით რიგში დგომის შემდეგ მათ ბილეთები არ შეხვდათ. დიდ მოთხოვნას ვერ გაუძლეს ბილეთების საიტებმაც, რომელთა გაუმართავმა მუშაობამაც ფანების გაბრაზება გამოიწვია.
„საათები გავატარე რიგში. ბოლო ნაბიჯზე კი მთლიანი საიტი მწყობრიდან გამოვიდა,” – ამბობს ერთ-ერთი ფანი. „როცა რიგში ვიყავი, ჩემი მეზობლის სახლიდან Wonderwall-ის ღრიალის ხმა გავიგე. ცხადი იყო, რომ ბილეთების ყიდვა მოახერხეს.”
დღის ბოლოს კი ბენდის წარმომადგენელმა განაცხადა, რომ ბილეთები სრულად გაიყიდა, თუმცა აღნიშნა, რომ უახლოეს მომავალში კიდევ ახალი კონცერტები დაანონსდება.
