16 და 17 ოქტომბერს საქართველოს შოთა რუსთაველის თეატრისა და კინოს სახელმწიფო უნივერსიტეტი უმასპინძლებს პროგრამას „ეჟი გროტოვსკი: 25 წელი პოლონელი რეჟისორის გარდაცვალებიდან.” ღონისძიებების სერია პოლონეთის გროტოვსკის ინსტიტუტთან თანამშრომლობით გაიმართება და მიეძღვნება ლეგენდარული პოლონელი რეჟისორის, მე-20 საუკუნის თეატრის რეფორმატორის, ეჟი გროტოვსკის გარდაცვალებიდან 25 წლის თავს.
პროგრამა მოიცავს გროტოვსკის შემოქმედებისა და მისი სახელობის ინსტიტუტის მუშაობისადმი მიძღვნილ ლექციებს. გარდა ამისა, ნაჩვენები იქნება ლეგენდარულ რეჟისორზე შექმნილი დოკუმენტური ფილმები: „წერილი ოპოლედან“ (რეჟისორი – მაიკლ ელსტერი) და „ეჟი გროტოვსკისთან ერთად: ნიენადოვკა 1980“ (რეჟისორი ჯილ გოდმილოუ), ასევე თავად გროტოვსკის ორი ლეგენდარული სპექტაკლის ჩანაწერი: მე-20 საუკუნის თეატრის ერთ-ერთ კანონიკურ შედევრად და „ღარიბი თეატრის” პრინციპების მანიფესტაციად მიჩნეული სპექტაკლი „აკროპოლისი“ და გროტოვსკის ერთ-ერთი ყველაზე ცნობილი ნამუშევარი „უდრეკი პრინცი“, რომელიც მე-17 საუკუნის ესპანელი დრამატურგის, კალდერონის სამმოქმედებიანი დრამის უჩვეულო პოლონურ თარგმანს ეფუძნება.
ფოტო: გროტოვსკის ინსტიტუტის არქივი
რაც შეეხება მომხსენებლებს, ლექციებს წაიკითხავენ: გროტოვსკის ინსტიტუტის საგამომცემლო განყოფილების ხელმძღვანელი, თეატროლოგი მონიკა ბლიგე; იაგელონის უნივერსიტეტის თეატრისა და დრამის დეპარტამენტის პროფესორი ტადეუშ კორნაში, რომლის კვლევის საგანიც ძირითადად მე-20 საუკუნის თეატრისა და დრამის ისტორიაა; და თეატრის ისტორიკოსი ვანდა შვიონტკოვსკა, რომელიც იკვლევს შექსპირის პიესების ინტერპრეტაციას პოლონეთში, Reduta-სა და გროტოვსკის თეატრალური ლაბორატორიის ისტორიასა და იულიუშ ოსტერვას მემკვიდრეობას.
ლექციები და დოკუმენტური ფილმების ჩვენება გაიმართება თეატრისა და კინოს უნივერსიტეტის პირველ კორპუსში (რუსთაველის გამზირი 19). სპექტაკლების ჩანაწერების ჩვენება კი – მეორე კორპუსში (აღმაშენებლის გამზირი 40). დასწრება თავისუფალია.
ღონისძიების ფარგლებში საქართველოს შოთა რუსთაველის თეატრისა და კინოს სახელმწიფო უნივერსიტეტსა და პოლონეთის გროტოვსკის ინსტიტუტს შორის ხელი მოეწერება ურთიერთთანამშრომლობის მემორანდუმს.
პროექტი თანადაფინანსებულია პოლონეთის რესპუბლიკის კულტურისა და ეროვნული მემკვიდრეობის მინისტრის კულტურის ხელშეწყობის ფონდიდან.
იხილეთ ღონისძიებების პროგრამა:
