25 და 26 სექტემბერს Factory Tbilisi-ს სივრცემ წლის ერთ-ერთ ყველაზე გამორჩეულ და ინოვაციურ სახელოვნებო პროექტს უმასპინძლა. QUEMMEKH-ის მუსიკალურმა ლაივ-შოუმ – UNBURNED მაყურებელს სრულიად ახალი, ჰიბრიდული ფორმატი წარუდგინა, სადაც მუსიკა, თეატრალური ხელოვნება და თანამედროვე ქორეოგრაფია ერთიან, ორგანულ სანახაობად იქცა. მუსიკალურ ლაივ-შოუში სხვადასხვა მედიუმში მომუშავე 20-ზე მეტი არტისტი მონაწილეობდა.
UNBURNED არ იყო მხოლოდ კონცერტი ან კლასიკური გაგებით თეატრალური წარმოდგენა. მისი მთავარი იდეა სწორედ სხვადასხვა სახელოვნებო ფორმის ერთ სივრცეში თავმოყრას მოიაზრებდა.
ფოტო: ნინუცა კაკაბაძე
შოუს განმავლობაში ერთმანეთს განსხვავებული თემატიკის პერფორმანსები ცვლიდნენ და დამოუკიდებელ ვიზუალურ თუ თეატრალურ ამბავს ყვებოდნენ.
სანამ ძირითადი ღონისძიება დაიწყებოდა, აუდიტორიას Dogville-ის პავილიონის დათვალიერების შესაძლებლობა ჰქონდა, სადაც ზღაპრის, კინოს, თეატრისა და პერფორმანსის ელემენტები ერთ ვიზუალურ სამყაროს ქმნიდნენ.
Factory Tbilisi-ს მთავარ სივრცეში მოწყობილი ორი დიდი სცენა ერთმანეთთან სპეციალური ხიდით იყო დაკავშირებული, რამაც შოუს მთლიანი არქიტექტურა და კონცეფცია შექმნა. სივრცეში მაყურებელი ერთდროულად სხვადასხვა მოქმედების, პერსონაჟისა და ვიზუალური ისტორიის მონაწილე ხდებოდა, რის გამოც UNBURNED პერიფერიული აღქმის გამოცდილებად იქცა.
ფოტო: ნინუცა კაკაბაძე
შოუს ერთ-ერთი ყველაზე ეფექტური და მოულოდნელი კულმინაცია ე.წ. Secret Guest-ის გამოჩენა გახდა. სცენის ერთ მხარეს აღმართულ ქართლის დედის მონუმენტთან მომღერალი სოფო ნიჟარაძე ამწით გამოჩნდა. მან QUEMMEKH-თან ერთად კომპოზიცია Otobaia შეასრულა, რის შემდეგაც აუდიტორიას დები იშხნელების ცნობილი სიმღერის – „არ დაიჯერებ, არ დაიჯერებ“ საკუთარი, შთამბეჭდავი ვერსია შესთავაზა.
ფოტო: ნინუცა კაკაბაძე
ლაივ შოუს ერთ-ერთი გამორჩეული მუსიკალური ეპიზოდი სანდრო დიასამიძის, Bedford Falls-ის წევრის, გამოსვლა იყო. მან QUEMMEKH-ის კომპოზიცია „ანუბისი და მწეველი“ შეასრულა და შოუს დამატებით რეივ დინამიკა შესძინა.
ფოტო: ნინუცა კაკაბაძე
საღამოს დასასრულს კი სცენაზე ბავშვთა გუნდი წარდგა, რომელმაც QUEMMEKH-ის მელანქოლიური კომპოზიცია „შენ“ აკაპელა შეასრულა. ამ შთამბეჭდავმა პერფორმანსმა მრავალფეროვანი სანახაობებით სავსე შოუს განსაკუთრებული ემოციური მუხტი შესძინა.
შოუს მუსიკალურ საფუძველს QUEMMEKH ქმნიდა, მისი კრეატიული დირექტორი და რეჟისორი გურამ მაცხონაშვილია. აღმასრულებელი პროდიუსერები მაშო გელაშვილი და სანდრო ქერაული, ქორეოგრაფი – ნათია ბუნტური, კოსტიუმების დიზაინერი კი KEBURIA.
UNBURNED სხვადასხვა მედიუმში მომუშავე 20-ზე მეტ არტისტს აერთიანებს. QUEMMEKH-თან ერთად სცენაზე წარდგნენ: ნინო კასრაძე, მაკა ჩიჩუა, ნათია ბუნტური, რუსუდან აბაშიძე, ნანკა კალატოზიშვილი, ხოსილიტა, ლუკრეციუს სიჭინავა, ალექსანდრე გადელია, გიორგი ჩიჩუა, ნინი გოგია, მარიანა ფარჯიანი, გიგი მღებრიშვილი, ლუკა მაჩაიძე და სხვები.
„დაბრუნება იყო შესანიშნავი. ამასთან ერთად, დარწმუნებული ვარ, ბევრი ახალი სახელოვნებო ცეცხლის კერა გავაჩინეთ ქალაქში, რომელიც, ვნახოთ, რაში გადაიზრდება.
ფოტო: ნინუცა კაკაბაძე
კარგი სტარტია. სიმართლე ვთქვა, ზუსტად ისაა, რასაც ველოდი და რასაც აპირებდა ქვემეხი – ახალი სახელოვნებო სტანდარტი ალტერნატიული სცენისთვის.“ – სანდრო ქერაული – QUEMMEKH.
მასშტაბური სახელოვნებო ლაივ-შოუს მთავარი ხიბლი სწორედ მისი ჰიბრიდული ხასიათი იყო, სადაც მუსიკა მხოლოდ მოსმენის, თეატრი სანახაობის, ხოლო პერფორმანსი ცალკე ეპიზოდის ჩარჩოს სცდება.
ეს იყო მრავალშრიანი, სინესთეზიური შოუ და თანამედროვე ქართული ხელოვნების ახალი განაცხადი – ფორმატი, რომელიც კონცერტსა და სპექტაკლს შორის ზღვარს შეგნებულად შლის და აუდიტორიას მის ერთიან აღქმას სთავაზობს.
ფოტო: ნინუცა კაკაბაძე
UNBURNED-ის დასრულების შემდეგ QUEMMEKH-მა სოციალურ ქსელში მადლობის ტექსტი გამოაქვეყნა. პოსტში ჯგუფი განსაკუთრებულად უსვამს ხაზს აუდიტორიის ენერგიას, იმ ადამიანებს, რომლებმაც UNBURNED-ის შექმნაში მიიღეს მონაწილეობა და თავად შოუს მთავარ იდეას – შექმნა ის, რაც ადამიანებს საკუთარი შეგრძნებების და სურვილების დამკვირვებლად აქცევს.
„მოდით, დავიწყოთ მადლობით. მადლობა! ორი დღე ზედიზედ. ორი ფულჰაუსი. ათასობით ადამიანი ერთ სივრცეში და რეაქტიული ენერგია! მადლობა ყველას, ვინც მოვიდა. მადლობა ყველას, ვინც ვერ მოვიდა. მადლობა ყველა არტისტს, მუსიკოსს, მსახიობს, ტექნიკოსს, რეჟისორს, მეგობარს, ნაცნობს და უცნობს. მადლობა ბავშვებს, რომ ასე გულით იმღერეს და მადლობა ყველას, ვინც ასე გულით ცეკვავდა სცენაზე თუ სცენის გარეთ, ჩვენთან ერთად. ვინც ამ ორი დღის შექმნაში თავისი პატარა ან დიდი წვლილი შეიტანა და საკუთარი ენერგია შთაბერა. UNBURNED არის იმის მტკიცებულება, რომ როცა რაღაცის შექმნა მართლა გინდა, გამოდის. თუ ამ ორ დღეში რაღაც იგრძენით, რაღაც დაინახეთ, რაღაც მოგინდათ, რაღაც გაგახსენდათ, ესე იგი, კვლავ გამოგვივიდა. ცეცხლი აინთო, თამაში დაიწყო. xoxo🔥🌷“
