ბონო იმ 19 ადამიანს შორისაა, რომელთაც ამერიკის უმაღლესი ჯილდო – თავისუფლების საპრეზიდენტო მედალი გადაეცათ. ამის შესახებ პრეზიდენტმა ჯო ბაიდენმა 4 იანვარს განაცხადა.
U2-ს სოლისტის გარდა, ჯილდო მიენიჭათ ჰილარი კლინტონს, NBA-ს ლეგენდა ირვინ ჯონსონს, ლიონელ მესის, ბილ ნაის (Bill Nye the Science Guy), ანა ვინტურს, ჯორჯ სოროსს, რალფ ლორენს, შეფ ხოსე ანდრესს და ჯეინ გუდოლს.
„პრეზიდენტ ბაიდენს სწამს, რომ დიდი ლიდერები ინარჩუნებენ რწმენას, ყველას აძლევენ თანაბარ შესაძლებლობებს და ღირსებას ყველაფერზე მაღლა აყენებენ,” – წერს თეთრი სახლი გავრცელებულ განცხადებაში. „ეს 19 ადამიანი არის დიდი ლიდერი, რომლებმაც ამერიკა და მსოფლიო უკეთეს ადგილად აქციეს. ისინი არიან დიდი ლიდერები, რადგან არიან კარგი ადამიანები, რომლებსაც განსაკუთრებული წვლილი მიუძღვით თავიანთი ქვეყნებისა და მსოფლიოს წინაშე.”
განცხადებაში ასევე აღნიშნულია, რომ თავისუფლების საპრეზიდენტო მედალი „გადაეცემათ ადამიანებს, რომლებმაც სამაგალითო წვლილი შეიტანეს აშშ-ის კეთილდღეობაში, ღირებულებებსა და უსაფრთხოებაში, ასევე მსოფლიო მშვიდობის დარგში ან სხვა მნიშვნელოვან საზოგადოებრივ, საჯარო თუ კერძო საქმიანობაში.”
ბონოს წარდგენისას თეთრმა სახლმა ხაზი გაუსვა, რომ ლეგენდარული ირლანდიელი როკერი არის „პიონერი აქტივისტი შიდსსა და სიღარიბესთან ბრძოლაში” და აღნიშნა მისი როლი დაპირისპირებული პარტიების გაერთიანებაში PEPFAR AIDS-ის პროგრამის შესაქმნელად. ბონო ასევე არის თანადამფუძნებელი ორგანიზაციებისა ONE და (RED).
რამდენიმე კვირის წინ U2-მ How to Re-assemble an Atomic Bomb გამოსცა – სპეციალური გამოშვება, რომელიც How to Dismantle an Atomic Bomb-ის 20 წლის იუბილეს მიეძღვნა. მასში შედის აქამდე გამოუქვეყნებელი კომპოზიციები 2004 წლის ალბომის ჩაწერის სესიებიდან.
U2-ს ბოლო ალბომი Songs of Surrender 2023 წლის მარტში გამოვიდა და Billboard 200-ში მეხუთე ადგილი დაიკავა.
