ქანთრის ლეგენდა დოლი პარტონი 14 მარტს, Dollywood-ის 40 წლის იუბილეს სეზონის გახსნის ღონისძიებას დაესწრო. ეს მომღერლისათვის პირველი საჯარო გამოჩენა იყო მას შემდეგ, რაც მისი ქმარი, კარლ დინი გარდაიცვალა.
პარტონმა ღონისძიება სტუმრებისადმი მიმართვით გახსნა. ვარსკვლავმა მათ თანადგომისათვის მადლობა გადაუხადა. ტელეკომპანია WVLT-ის ცნობით, პარტონმა განაცხადა: „უბრალოდ მინდა, მადლობა გითხრათ ყვავილებისთვის, ბარათებისთვის და კეთილი სურვილებისთვის.”
ამის შემდეგ, პარტონმა წარმოთქვა სიტყვები, რომლებიც შთაგონებულია 1973 წლის ცნობილი ბალადით, Will Always Love You: „მინდოდა გცოდნოდათ, რომ, რა თქმა უნდა, ყოველთვის მეყვარება ის. ძალიან მომენატრება და რა თქმა უნდა, ყოველთვის მეყვარებით თქვენც.”
კარლ დინი 82 წლის ასაკში გარდაიცვალა. „კარლთან უამრავი საოცარი წელი გავატარე. 60 წელზე მეტხანს ვიზიარებდით სიყვარულს, რომელსაც სიტყვებით ვერ გადმოვცემ,” – განაცხადა პარტონმა ქმრის გარდაცვალების შემდგომ გამოქვეყნებულ საჯარო განცხადებაში. ოჯახს დინის გარდაცვალების მიზეზი საჯაროდ არ გაუჟღერებია.
პარტონმა და დინმა ერთმანეთი ნეშვილში გაიცნეს და 1966 წლის 30 მაისს, რინგგოლდში, ჯორჯიას შტატში იქორწინეს. 2016 წელს, მათი ქორწინების 50 წლისთავზე, წყვილმა ფიცი განაახლა.
ქმრის გარდაცვალების შემდეგ დოლი პარტონმა დინს პატივი მიაგო სიმღერით – If You Hadn’t Been There.
