„ახალი თეატრი” მანიფესტს აანონსებს. ამის შესახებ საგანგებო განცხადება დღეს თეატრის სამხატვრო ხელმძღვანელმა დავით დოიაშვილმა „ახალი თეატრის” შენობასთან შეკრებილ მოქალაქეებთან გააკეთა. მანიფესტს წინ უძღოდა რეჟისორის მოთხოვნა მსახიობ ანდრო ჭიჭინაძისა და მასთან ერთად დაკავებული პირების საპატიმროდან განთავისუფლებაზე. დოიაშვილმა ხელისუფლებას ვადა 20 იანვრამდე მისცა, წინააღმდეგ შემთხვევაში თეატრის მხრიდან შესაბამისი რეაგირება დააანონსა.
„აქ დგომა არ იყო ჩვენი არჩევანი. ჩვენ ყველაფერი გავაკეთეთ, რომ დიალოგი გამოგვენახა პროკურატურასთან. ჩავწერეთ ვიდეოები, გავაჩერეთ სპექტაკლები, შევაგროვეთ ხელმოწერები, თავდებში დაუდგა მთელი თეატრი და არა მხოლოდ თეატრი – მთელი ქართული კულტურა და დიდი მადლობა ამ ხალხს, ვინც დაგვეხმარა,” – განაცხადა დოიაშვილმა. „კიდევ ერთხელ გეუბნებით: რაც არ უნდა დააბნელოთ მთელი ქალაქი, სცენაზე შუქი აინთება და იქ ჩვენ ვიქნებით და ჩვენ გავიმარჯვებთ!”
საგანგებო მიმართვისას რეჟისორმა რეგიონებში გასვლაც დააანონსა და იმედი გამოთქვა, რომ დასს სხვა თეატრებიც შეუერთდებიან.
„ახალი თეატრის” მსახიობი ანდრო ჭიჭინაძე 5 დეკემბერს საკუთარ სახლში დააკავეს. მსახიობისა და კიდევ 10 დაკავებულის სასამართლო პროცესი 5 მარტსაა ჩანიშნული (16 იანვრის ნაცვლად). მანამდე კი მოსამართლემ დაკავებულები პატიმრობაში დატოვა.
