Paramount+-ის ახალი დოკუმენტური ფილმის, The Carters-ის გამოსვლა წლის ბოლოს იგეგმება.
როგორც 22 იანვარს გამოცხადდა, ორნაწილიანი პროექტი მაყურებელს „ღრმად პერსონალურ ხედვას, ოჯახის უდიდეს გამარჯვებებსა და ტრაგიკულ მოვლენებს ასახავს,“ რომლებიც ნიკ კარტერის ჯგუფ Backstreet Boys-თან, და აარონ კარტერის სოლო კარიერასთან არის დაკავშირებული. აარონის ტყუპისცალი დის თვალით დანახული დოკუმენტური ფილმი კარტერების ოჯახის ტრაგიკულ ამბავს გვიყვება, სადაც აქამდე გამოუქვეყნებელი საოჯახო ვიდეოები და ექსკლუზიური ინტერვიუები იქნება შესული.
დოკუმენტური ფილმის აღწერაში ვკითხულობთ: „დოკუმენტური ფილმი ამერიკელი თინეიჯერების ნამდვილ კერპებს, ნიკ და აარონ კარტერებს ეძღვნებათ, რომლებიც ყველაფერს ფლობდნენ, თუმცა მათი განსაკუთრებული ნიჭის მიღმა იყო ოჯახი, რომელიც მენტალური ჯანმრთელობისა და ნარკოტიკებზე დამოკიდებულების პრობლემებით იტანჯებოდა.”
ფილმის გამოსვლის ზუსტი თარიღი ჯერჯერობით უცნობია. რეჟისორმა სოლეი მუნ ფრაიმ განაცხადა: „მორალურ პასუხისმგებლობას ვგრძნობ, რომ შევქმნა უსაფრთხო სივრცე, სადაც სხვებს შეეძლებათ თავიანთი სიმართლის გაზიარება… ენჯელის სიმამაცე, რომელსაც ის ოჯახის მენტალური ჯანმრთელობის პრობლემების, დამოკიდებულების, ტკივილის, აუტანელი დანაკარგის შესახებ გამოხატავს, სიყვარულის ისტორიის გაზიარება და უნიკალურობის დადასტურებაა.“
„ეს დოკუმენტური ფილმი ჩემი ოჯახის სიყვარულის ნაყოფია, ჩვენი ნამდვილი ისტორიის — დანაკარგის, გამძლეობის და განკურნების — გაზიარებით, იმედი მაქვს, რომ პატივს ვცემ ჩვენს განვლილ გზას, რითაც ჩვენს წარსულს იმედისა და მიზნების მიღწევის გზავნილად ვაქცევ მათთვის, ვისაც მსგავსი გამოწვევები აქვს ცხოვრებაში“, – ამბობს ენჯელ კარტერ კონრადი.
კარტერების დედმამიშვილები ხუთნი იყვნენ. ნიკს, აარონსა და ენჯელს ჰყავდათ დები – ლესლი და ბობი ჯინი. ლესლი 2012 წელს, ბობი ჯინი კი 2023 წელს ნარკოტიკული ზედოზირებით გარდაიცვალნენ. აარონ კარტერი 2022 წლის 5 ნოემბერს კალიფორნიაში, საკუთარ სახლში, უბედური შემთხვევის შედეგად დაიღუპა და დედმამიშვილებმა ასევე დაკარგეს მამა, რომელიც 2017 წელს გულის შეტევით გარდაიცვალა.
როგორც ჩანს, ნიკ კარტერი დოკუმენტური ფილმის გადაღებებში ჩართული არ არის. ამჟამად მას სამი ქალი სექსუალურ ძალადობაში ადანაშაულებს – შენონ „შეი“ რუთი, ჯგუფ Dream-ის მომღერალი მელისა შუმანი და ჯეინ დოუ. 2023 წლის აგვისტოში ჯეინ დოუმ სარჩელი შეიტანა, რომელშიც ნიკს 2003 წელს მომხდარ ამბავზე ადანაშაულებს, როდესაც ის 15 წლის იყო და ნიკ კარტერმა არაერთხელ იძალადა მასზე. შენონ „შეი“ რუთმა 2022 წლის დეკემბერში უჩივლა ნიკ კარტერს. მისი თქმით, მომღერალმა იგი თინეიჯერობის პერიოდში ტურისტულ ავტობუსში გააუპატიურა, ხოლო მელისა შუმანმა სარჩელი 2023 წლის აპრილში შეიტანა, სადაც ის ამტკიცებს, რომ ნიკმა მას ნარკოტიკებით გაჯერებული ალკოჰოლი მისცა, როცა ის 18 წლის იყო, შემდეგ კი სექსუალურად იძალადა მასზე.
