Oasis-ის ვოკალისტმა ლიემ გალაგერმა თავისი აზრი გამოთქვა ბრიტანული ბენდის Bring Me the Horizon-ის მიერ შესრულებულ სიმღერაზე Wonderwall.
ბრიტანულმა კვარტეტმა ცნობილი სიმღერის საკუთარი ვერსია 29 იანვარს (Spotify Singles სერიების ფარგლებში) გაავრცელა. მათი ვერსია ბრიტპოპის ჰიმნის აკუსტიკურ გიტარებს ელექტრონულით ანაცვლებს, ხოლო ალან უაითის მსუბუქ პერკუსიას მძაფრი დრამები ცვლის.
გარდა ამისა, სინგლის ქავერის დიზაინი Oasis-ის ორიგინალური მუსიკალური ვიდეოს სტილს იმეორებს. ბენდმა კი სოციალურ ქსელებში სიმღერა ვირუსულად გავრცელებული ფრაზით, Anyway, here’s ‘Wonderwall-ით გაჟღერეს.
მიუხედავად იმისა, რომ Bring Me the Horizon-ის ქავერ ვერსიამ უკვე მოიპოვა ბენდის ფანების მოწონება, გულშემატკივრების ყურადღებამ მალევე ლიემ გალაგერისკენ გადაინაცვლა. მისი არაპროგნოზირებადი და პირდაპირი ხასიათი ხშირად მკაცრი შეფასებებით გამოირჩევა. ლიემი პირდაპირ აფიქსირებს აზრს იმის შესახებ რაც არ მოსწონს, თუმცა, ამჯერად მან გულშემატკივრების პროგნოზი არ გაამართლა და სიმღერა მოიწონა.
„წარმოუდგენლად მომწონს!“ – წერს ლიემ გალაგერი „არ ვარ გაბრაზებული, ეს აბსოლუტურად წარმოუდგენელია, დღე გამილამაზა! მიყვარხართ!“ – პასუხობს ის ერთ-ერთ გულშემატკივარს კომენტარის სახით.
Oasis-ის სიმღერა Wonderwall ჯგუფის 1995 წელს გამოშვებული მეორე ალბომის, (What’s the Story) Morning Glory?-ის მეოთხე სინგლი იყო. სიმღერა მალევე გახდა ბენდის სავიზიტო ბარათი და ბილბორდ 100-ში მერვე ადგილი დაიკავა, რაც Oasis-ისთვის ყველაზე მაღალი პოზიცია იყო. გარდა ამისა, ის 1997 წლის გრემის დაჯილდოებაზეც იყო ნომინირებული.
Oasis მსოფლიო ყურადღების ცენტრში 2024 წელსაც მოექცა, როცა ბენდმა წლის ერთ-ერთი ყველაზე გამორჩეული რეიუნიონ-ტური დააანონსა. ტური წელს, 4 ივლისს, უელსში დაიწყება, ხოლო აგვისტოსა და სექტემბერში აშშ-ში გაგრძელდება.
მიუხედავად იმისა, რომ ტურმა უდიდესი ინტერესი გამოიწვია, განსაკუთრებით იმ მიზეზით, რომ ძმებმა, ლიემ და ნოელ გალაგერებმა, ხანგრძლივი დაპირისპირების შემდეგ ურთიერთობა აღადგინეს, ბილეთების Dynamic Pricing-ის გამო ის საკამათო თემადაც იქცა. ამ თვეში ცნობილი გახდა, რომ დიდი ბრიტანეთის მთავრობა ჩაატარებს გამოძიებას ბილეთების მეორად ბაზარზე არსებული პრობლემების გამო, რაც საზოგადოებაში დიდ უკმაყოფილებას იწვევს.
რაც შეეხება ბენდს Bring Me the Horizon, ის 2025 წლის Reading & Leeds Festival-ის ერთ-ერთ ჰედლაინერად დასახელდა. ფესტივალზე ასევე წარდგებიან ტრევის სკოტი, ჩაპელ ნოელი და Hozier.
