რიანას შვილების სახელები – RZA და Riot Rose სოციალურ ქსელში გააკრიტიკეს. მომხმარებელმა გამოცემა The Shade Room-ის ინსტაგრამის პოსტზე კომენტარი დატოვა, რომელშიც აღნიშნავდა, რომ მომღერლის შვილების სახელები არ მოსწონს. „კარგი, ტატიანა,“ – უპასუხა რიანამ კომენტარის ავტორს.
ქალთა საერთაშორისო დღეს რიანამ ინსტაგრამზე გამოაქვეყნა კადრები, რომლებიც ვარსკვლავის მშობიარობის შემდგომ პერიოდს ასახავს. მან ორი ფოტო გააზიარა – ერთი 2022 წლის მშობიარობიდან და მეორე – 2023 წლიდან. ორივე სურათზე ის ხელში ახალშობილით, სამშობიარო პალატაში წევს.
„ნამდვილად ყველაზე ძლიერი რამ, რაც ქალად ყოფნისას გამიკეთებია… ჩემი პატარა სასწაულები! და კი, მშობიარობის დროს მარგალიტები და მზის სათვალე მეკეთა. არ მკითხოთ, რატომ… ბევრი რამ ხდებოდა იმ მომენტში,“ – წერს რიანა პოსტის აღწერაში.
რიანას და A$AP Rocky-ს უფროსი შვილი RZA 2022 წლის მაისში, ხოლო უმცროსი Riot 2023 წლის აგვისტოში შეეძინათ. წყვილმა პირველი შვილის სახელი მისი დაბადებიდან თითქმის ერთი წლის შემდეგ, 2023 წელს გაამხილა და დაადასტურა, რომ ის Wu-Tang Clan-ის ფრონტმენის პატივსაცემად შეარჩიეს.
Harper’s Bazaar-ის 2024 წლის თებერვლის ნომრისთვის მიცემულ ინტერვიუში რიანამ გაამხილა, რომ უმცროსი შვილის სახელის იდეა ფარელ უილიამსს ეკუთვნის.
„ეს სახელი მაშინ გვირჩია, როცა ეგონა, რომ გოგო გვეყოლებოდა, რადგან ინტერნეტში რაღაც ნახა. ფარელი ყოველთვის ძალიან სიღრმისეულად უდგება ყველაფერს,” – აღნიშნა რიანამ.
იმავე ინტერვიუში ვარსკვლავმა თავისი შვილების განსხვავებულ ხასიათზეც ისაუბრა: „RZA ნამდვილი სასწაულია. უყვარს მუსიკა, მელოდია, წიგნები, წყალი… აბაზანა, აუზი, ზღვა – ყველაფერი. და Riot? ის უბრალოდ სასაცილოა! რომ იღვიძებს, ყვირილს და კივილს იწყებს. მაგრამ არა ტირილის გამო, – უბრალოდ სიმღერა უნდა.”
