მუსიკოსი ალექსანდრე ხარანაულის სადებიუტო ალბომი „დილით ამომავალო მზეო“ გასული წლის მარტში დარელიზდა. ქართული და მსოფლიო ფოლკის ნაზავი აკუსტიკური გიტარის თანხლებით, ახალი სიტყვაა ქართულ მუსიკაში. ალექსანდრე ხარანაულის მუსიკაში განსაკუთრებული ადგილი უჭირავს ტექსტებს – თითოეული სიმღერა ერთგვარი ამბის თხრობაა, სადაც მელოდია და ლირიკა ერთმანეთთან ჰარმონიულად იკვეთება.
9 თებერვალს, მუსიკოსმა ახალი სიმღერა „შენ“ გამოსცა, რომელიც ამავე სახელწოდების მომავალ ალბომში იქნება შესული.
ალექსანდრე ხარანაული – მუსიკოსი:
„შენ“ არის ამავე სახელწოდების ალბომის რიგით მეორე სიმღერა. ალბომში ექვსი სიმღერა იქნება და ნელ-ნელა დავდებ ყველას. იმიტომ, კი არა, რომ ეგეთი ტაქტიკა მაქვს, უბრალოდ, მიქსინგი/მასტერინგი მიმდინარეობს პარალელურად.
„შენ, შენებრ, მშენებლებს, შავგვრემნებს, ავაგებინებ სახლს, სასახლეს. კარზე დავაბამ ძაღლს, დიდხანს ვისახლებ.“
ეს სიმღერა ათი წლის წინ დავწერე და სულ მინდოდა ჩაწერა, მაგრამ ახლაღა მოვახერხე. ტექსტში იგულისხმება, რომ იმ კულტურას, რომელსაც ამდენი ხანი ქმნიდა ხალხი, ავიღებ, გამოვიყენებ, ჩემად ვაქცევ და უკვდავვყოფ. რა თქმა უნდა, ეს ოცნებაა და „მე ამას ვიზამ“ უმნიშვნელოა. ასე უნდა ვქნათ ჩვენ ყველამ. ვიდეოს იდეა ჩემია, მაგრამ იმდენჯერ იცვალა სახე და ფორმა, რომ საბოლოოდ, ვიდეო თავიდან ბოლომდე ეკუთვნის ნიკა თაბუკაშვილს. ფოტოებიც მისია. მათი დიდი ნაწილი გადავიღეთ ნავთლუღის ბაზართან და დამატებით კიდევ რამდენიმე ადგილას თბილისში.“
მოისმინეთ ალექსანდრე ხარანაულის სიმღერა „შენ”
