ფანები დიდხანს ელოდნენ Black Sabbath-ის სრულმასშტაბიან გაერთიანებას ოზი ოზბორნის გამოსამშვიდობებელ კონცერტზე, თუმცა მათი მოლოდინი არ გამართლდა. ოზი ოზბორნმა გაამხილა, რომ ბენდთან ერთად სრულ პროგრამას არ შეასრულებს. ეს განცხადება მან თავის პოდკასტში Ozzy Speaks გააკეთა და ისაუბრა Back to the Beginning კონცერტზე, რომლის პროგრამაც მოიცავს Black Sabbath-სა და ოზი ოზბორნს ისეთ დიდ სახელებთან ერთად, როგორებიცაა Metallica, Slayer და Anthrax.
„Black Sabbath-თან ერთად სრული სეტის დაკვრას არ ვგეგმავ. ცალკეულ ნაწარმოებებს შევასრულებთ,” – თქვა მან. „იმას ვაკეთებ, რაც შემიძლია და სადაც თავს კომფორტულად ვგრძნობ.”
ოზბორნს სრული საკონცერტო პროგრამა აღარ შეუსრულებია 2018 წლის 31 დეკემბრის შემდეგ, როცა No More Tours-ის ბოლო კონცერტი გამართა. ორი თვის შემდეგ კი მეტალის პიონერს პარკინსონის დიაგნოზი დაუსვეს. შესაბამისად, მისი მომავალი საკონცერტო თარიღები გაუქმდა.
„ვცდილობ, ისევ წამოვდგე ფეხზე,” – დაამატა მუსიკოსმა. „როცა დილას დგები, ჩვეულებისამებრ, საწოლიდან ხტები. მე კი ჯერ თავი უნდა დავაბალანსო, თუმცა მკვდარი არ ვარ. მაინც აქტიური ვარ და შემიძლია რაღაცების გაკეთება.”
ცოტა ხნის წინ ოზბორნი მსმენელს ეუბნებოდა, რომ ჯანმრთელობის არაერთი პრობლემის მიუხედავად, ის ბრძოლას განაგრძობდა.
„2025 წელსაც მოვესწარი. ვერ დავდივარ, მაგრამ იცით, რას ვფიქრობდი ამ დღესასწაულების დროს? რაც არ უნდა დავიჩივლო, მაინც ცოცხალი ვარ. შეიძლება ვგლოვობდე იმას, რომ ვერ დავდივარ, მაგრამ შემდეგ ვიყურები და ამ გზაზე უამრავი ადამიანია, რომელმაც იმის ნახევრის გაკეთებაც ვერ შეძლო, რაც მე მოვახერხე.”
ივლისის კონცერტის შესახებ „ბი-ბი-სი-სთან” საუბრისას ოზბორნის მეუღლემ და მენეჯერმა შერონმა აღნიშნა, რომ ეს შოუ ოზბორნისთვის ჯანმრთელობის მდგომარეობის გამო შეწყვეტილი კარიერის დასრულების შესაძლებლობაა.„ის კარგად არის. ძალიან ბედნიერია ამ ყველაფრით – ბიჭებთან და მეგობრებთან კვლავ გაერთიანებით. ეს ყველასთვის სასიხარულოა. ოზის არ ჰქონია მეგობრებთან და ფანებთან დამშვიდობების შესაძლებლობა და ისეთი შეგრძნება აქვს, რომ წერტილი არ დასმულა. ეს იქნება მისი წერტილი.”
