Tyler, the Creator და Nardwuar ერთმანეთს ვანკუვერის ბოტანიკურ ბაღში შეხვდნენ და 14 წლის განმავლობაში რიგით მეშვიდე ინტერვიუ ჩაწერეს. ტაილერს კი, რა თქმა უნდა, ბევრი რამ დაუგროვდა გასაზიარებელი.
Nardwuar-მა რეპერს ჰკითხა, თუ რას ფიქრობდა ჰიპ-ჰოპის 50 წლის იუბილეს აღნიშვნაზე. ტაილერმა კი მადლიერება გამოხატა ჰიპ-ჰოპის მიმართ, რადგან, მისი თქმით, შეუძლია იცხოვროს იმით, რისი კეთებაც უყვარს. „ჰიპ-ჰოპმა ძალიან ბევრი რამ შეცვალა ჩვენს ცხოვრებაში და ბევრი ჩვენგანი პრობლემებისგან იხსნა. ძალიან მადლიერი ვარ. კრიტიკაც გამომითქვამს მის მიმართ, მაგრამ ეს მხოლოდ სიყვარულიდან მოდის, რადგან მე ძალიან მიყვარს მუსიკა და განსაკუთრებით – ჰიპ-ჰოპი.”
რეპერმა გაიხსენა, თუ როგორ დაეხმარა Black Eyed Peas-ის სადებიუტო ალბომი Behind the Front და Dr. Dre-ს „2001” სმენის ფორმირებაში და შთააგონა, რომ პირველი რეპი დაეწერა. „მიყვარს ჰიპ-ჰოპი, მიყვარს რეპი. ეს ერთ-ერთი ყველაზე მშვენიერი რამაა, რაც კი დედამიწაზე არსებობს,” – თქვა ტაილერმა, სანამ იმ რეპერებს გააკრიტიკებდა, რომლებიც ინდუსტრიაში, მისი თქმით, მარტივი თანხის საშოვნელად მოდიან.
„ჩვენ ყველაზე მაგრები ვართ. ამ ვიღაცებს კი ჩვენი მიბაძვა სურთ, თუმცა მათ არანაირი გავლენა არ აქვთ, რადგან თავადვე არ სჯერათ ამის. ზოგი მათგანი ამ ყველაფერს უყურებს, როგორც ფულის შოვნის სწრაფ გზას. ჰიპ-ჰოპს უყურებს, როგორც სამომხმარებლო პროდუქტს. ეს ძალიან მარტივი დასანახია. რომ ამბობენ: „ამა და ამ დღეს შემიყვარდა ჰიპ-ჰოპი,” – ეს არც ვიცი, რას ნიშნავს, რადგან ის მთელი ცხოვრების განმავლობაში ჩემ გარშემოა. მე ვარ რეპი, მე ვარ ჰიპ-ჰოპი. სულ ესაა, რაც ვიცი.”
ნახეთ სრული ინტერვიუ:
