მუსიკოსი და კომპოზიტორი კორძი (ალექსანდრე კორძაია) 13 აპრილს ციურიხში, ქართული კულტურის ინტერდისციპლინურ ფესტივალზე დაუკრავს. ფესტივალზე, სახელწოდებით „ხიდი: ციურიხი – თბილისი”, კორძი სხვა ქართველ არტისტებთან ერთად წარდგება. ღონისძიების სახელწოდებაა Ending Pad, რომელიც სამი ნაწილისგან შედგება. პირველი ნაწილი Ensemble Kiosk-ს, მეორე ნაწილი – ანუშკა ჩხეიძეს, ხოლო მესამე ნაწილი კორძის დაეთმობა. კონცერტზე მუსიკოსების ახალი ნამუშევრები შესრულდება.
ტერმინი Ending Pad აღნიშნავს საბოლოო წერტილს ან გარდამავალ სივრცეს, რომელიც შესაძლოა იყოს დასასრული ან ხიდი ახალი ფაზისკენ. ის აღწერს მომენტს, როცა სრულდება ერთი ეტაპი, რომლის შემდეგაც, შესაძლოა, ახალი დაიწყოს.
ფესტივალი „ხიდი: ციურიხი – თბილისი” 2021 წელს „ქართული კულტურის პლატფორმის” მიერ ციურიხში დაარსდა და ხელოვნების სხვადასხვა მიმართულებას აერთიანებს. მუსიკოსების გარდა, წლევანდელი ფესტივალის მონაწილეები არიან: ფოტოგრაფი გურამ წიბახაშვილი, მწერალი ივა ფეზუაშვილი, საბუნებისმეტყველო მეცნიერებათა დოქტორი ანი მარგველაშვილი, რეჟისორები: ალექსანდრე კობერიძე, დეა კულუმბეგაშვილი, ლანა ღოღობერიძე, ლუკა ბერაძე, ირინე ჟორდანია, ტატო კოტეტიშვილი, სოსო ბლიაძე.
ფესტივალი 9 აპრილს დაიწყება და 13 აპრილს ქართველი მუსიკოსების კონცერტით დასრულდება. სხვა თანამედროვე ქართულ ფილმებთან ერთად, გაიმართება ლუკა ბერაძის „ღიმილიანი საქართველოს” ჩვენებაც, რომლის მუსიკის ავტორიც ასევე ალექსანდრე კორძაიაა.
დეტალური ინფორმაცია იხილეთ ფესტივალის ვებგვერდზე.
