ველ კილმერი, ბეტმენისა და ჯიმ მორისონის როლების შემსრულებელი მსახიობი, 65 წლის ასაკში გარდაიცვალა. ინფორმაციას მისი ქალიშვილი მერსედეს კილმერი ავრცელებს. მისი თქმით, მსახიობის გარდაცვალების მიზეზი პნევმონია გახდა. როგორც ცნობილია, 2015 წელს კილმერს ხორხის კიბოს დიაგნოზი დაუსვეს. 2021 წელს მასზე გადაღებულ დოკუმენტურ ფილმში კი იგი თავად აჩვენებდა, რომ სასუნთქი მილი სჭირდებოდა.
კილმერმა ცნობადობა 1986 წლის ფილმში, Top Gun-ში შესრულებული როლით მოიპოვა, სადაც ის ტომ კრუზთან ერთად თამაშობს. ბევრი გულშემატკივრისთვის ეს პერსონაჟი დღემდე კილმერის სავიზიტო როლად რჩება.
1991 წელს მსახიობმა ჯიმ მორისონი განასახიერა ოლივერ სტოუნის ფილმში The Doors, რისთვისაც ის თვეების განმავლობაში ემზადებოდა. 1995 წელს კი კილმერმა მაიკლ კიტონი ჩაანაცვლა ბეტმენის როლზე ჯოელ შუმახერის ფილმში Batman Forever. „ჩემთვის ველ კილმერი საუკეთესო ბეტმენი იყო,” – აღნიშნავდა შემდგომ რეჟისორი.
