საერთაშორისო თეატრალური ფესტივალის ,,SITFY-საქართველოს” ფარგლებში, 2-6 აპრილს, თბილისმა 15 ქვეყნის თეატრალურ დასსა და წარმომადგენელს უმასპინძლა.
6 აპრილს კი სოხუმის სახელმწიფო დრამატულ თეატრში, თეატრალური ფესტივალის „SITFY – საქართველოს“ დახურვისა და დაჯილდოების ცერემონია გაიმართა.
ფესტივალი SITFY (შარმ ელ-შეიხის საერთაშორისო თეატრალური ფესტივალი ახალგაზრდებისათვის) 2016 წლის იანვარში მსახიობისა და რეჟისორის, მაზენ ელ-გარაბავის მიერ დაარსდა და ეტაპობრივად გლობალურ ღონისძიებად იქცა.
2024 წელს პოლონეთში SITFY-ის წარმატებული დებიუტის შემდეგ, საქართველო ფესტივალის მეორე ევროპული დანიშნულების ადგილი გახდა, სადაც „SITFY საქართველო – საერთაშორისო თეატრალური ფესტივალი (აბრეშუმის გზა)“ 2025 წლის 2-6 აპრილს პირველად ჩატარდა.
მაზენ ელ-გარაბავი – ფესტივალ SITFY-ს დამაარსებელი:
„ჩემთვის დიდი პატივია, რომ ვიწყებთ ისტორიულ მომავალ კოლაბორაციას ეგვიპტესა და საქართველოს შორის. ეს შესანიშნავი მომენტია. ერთი წლის წინ გადავწყვიტეთ, შეგვექმნა რაღაც ძლიერი კავშირი ეგვიპტესა და საქართველოს შორის და ეს-ესაა, Sitfy Georgia-ს პირველი გამოშვებაც დავასრულეთ.
ახალგაზრდა თეატრალებისთვის ძალიან მნიშვნელოვანია, რომ გაიცნონ ერთმანეთი კულტურისა და ხელოვნების მეშვეობით, იგრძნონ ერთმანეთი, შეიქმნას კავშირი. თეატრი ჩვეულებრივი ენა არ არის – ეს უნიკალურია ენაა, სადაც შეგვიძლია, ერთად შევქმნათ რაღაც, რაც დაგვაკავშირებს და გაგვაერთიანებს.
დღეს მსოფლიოში რთული პროცესები მიმდინარეობს, ამიტომ განსაკუთრებით მნიშვნელოვანია, რომ ხელოვნების და თეატრის მეშვეობით ვიყოთ ერთმანეთთან დაკავშირებული. ჩვენ მართლაც ბევრი ვიმუშავეთ, რომ აქამდე მოვსულიყავით და შეგვექმნა რაღაც ძლიერი, ამიტომ ბედნიერი ვარ, რომ Sitfy Georgia დავაფუძნეთ.
ძალიან მიყვარს თბილისი, ქართველი ხალხი, ძალიან სტუმართმოყვარე და თბილი ხალხია. ჩემი აზრით, შესანიშნავი ფესტივალი შევქმენით. ვიმედოვნებ, რომ ის გაგრძელდება და ტრადიციად იქცევა.“
„SITFY – საქართველოს“ ფესტივალის ორგანიზატორები იყვნენ: შარმ ელ-შეიხის საერთაშორისო თეატრალური ფესტივალი ახალგაზრდებისთვის (SITFY) და იუნესკოს თეატრის საერთაშორისო ინსტიტუტის საქართველოს ეროვნული ცენტრი (ITI Georgia).
თეატრის საერთაშორისო ინსტიტუტის აღმასრულებელი საბჭოს წევრი, „SITFY საქართველოს” გენერალური დირექტორი – ლევან ხეთაგური:
„ეს ფესტივალი ჩვენთვის მოიაზრება, როგორც აბრეშუმის გზის ერთ-ერთი პროექტი. შარშან შევქმენით აბრეშუმის გზის კულტურის ჰაბი, რომელშიც დაახლოებით 20-მდე ქვეყანა მონაწილეობდა. ამჯერად ჩვენი პარტნიორები იყვნენ ეგვიპტიდან, თუმცა გეოგრაფია ისევ აბრეშუმის გზის ფარგლებში შენარჩუნდა. ჩვენ ვუმასპინძლეთ წარმომადგენლებს უნგრეთიდან, თურქეთიდან, რუმინეთიდან, არაბული ქვეყნებიდან, იაპონიიდან, და ვფიქრობ, რომ ჩემთვის, როგორც იუნესკოს თეატრის წარმომადგენლისთვის, ძალიან მნიშვნელოვანია ახალ რეგიონებთან დაკავშირება, გეოგრაფიის გაფართოება და სხვადასხვა კო-პროდუქციის შექმნა… ამ ფესტივალზე კონკრეტულად უნგრეთთან მოხდა მემორანდუმის გაფორმება, მაგრამ ასევე სხვა ქვეყნებთანაც დავსახეთ გარკვეული გეგმები. ვფიქრობ, შემდეგი წლისთვის უფრო მეტი ერთობლივი პროექტი იქნება.“
ფესტივალში მონაწილეობდნენ: საუდის არაბეთი, რუმინეთი, კატარი, ომანი, თურქეთი, იაპონია, უნგრეთი, საქართველო, ტუნისი, ბაჰრეინი და სხვ. თითოეულმა დასმა 1-საათიანი სპექტაკლი წარმოადგინა.
ფესტივალი საკონკურსო ხასიათს ატარებდა, სადაც ორ კაციანი სპექტაკლები – დუოდრამები იყო წარმოდგენილი, რომლებსაც სპეციალური საერთაშორისო ჟიური აფასებდა.
ჟიურის შემადგენლობაში იყვნენ: რეჟისორი და სოხუმის თეატრის სამხატვრო ხელმძღვანელი დავით საყვარელიძე (საქართველო), რეჟისორი აცუში კაკუ-მოტო (იაპონია), მეცნიერი და მკვლევარი, დოქტორი ქამლა ბინთ ალ-ვალიდ ალ-ჰინაი (ომანი), რეჟისორი და მენეჯერი ადამ ბერზინსკი ბელაგი (უნგრეთი), რეჟისორი, პროფესორი, დოქტორი ანტონელა კორნეკი (რუმინეთი).
გამარჯვებულები გამოვლინდნენ ნომინაციებში:
ჟიურის სპეციალური ჯილდო:
„რეჩიტატივი ქალაქში“ – რეჟ. კახა ბაკურაძე (საქართველო)
„ყოფილების სარეცელი“ – რეჟ. კახაბერ შარტავა (საქართველო)
„შემოდგომის ყვავილი“ – რეჟ. ტურკი ბა ესია (საუდის არაბეთი)
საუკეთესო რეჟისურა:
„ფარაჯანოვი” – რეჟ. ელ. მაცხონაშვილი (საქართველო)
საუკეთესო ტექსტი:
ზურაბ კანდელაკი (სპექტაკლი „მოსასმენი თამაში მაყურებლისთვის“ (საქართველო)
საუკეთესო სცენოგრაფია, განათება, კოსტიუმები:
„ალ-ზარი“ – რეჟისორი: მოჰამედ იუსეფ ალ მულლა (კატარი)
საუკეთესო მსახიობი ქალი:
ცეზარა ფანტუ („მე ვიყავი და ის იყო“ ) (რუმინეთი).
საუკეთესო მსახიობი მამაკაცი:
მოჰამედ ალ-რუჰადი („წვიმიანი ღამე“) (ომანი)
ფესტივალის საუკეთესო სპექტაკლი:
„წვიმიანი ღამე“ (რეჟ. მაჯიდ ბინ მასუდ ალ-აუფი) (ომანი)
ასევე ფესტივალის სპეციალური ჯილდოები გადაეცათ კომპანიებს:
TKT.GE-ს, BOLERO & COMPANY და სამშენებლო კომპანიას „ანაგი“ – ქართული თეატრის მხარდაჭერისა და მის განვითარებაში შეტანილი წვლილისთვის.
აღსანიშნავია, რომ ფესტივალი თბილისის მერიის, ეგვიპტის კულტურის მინისტრისა და სამხრეთ სინაის გუბერნატორის პატრონაჟით და აგრეთვე, ეგვიპტის ტურიზმისა და კულტურული მემკვიდრეობის სამინისტროს მხარდაჭერით განხორციელდა.
