დოლი პარტონის შემოქმედებით კარიერას Country Music Hall of Fame and Museum-ის გამოფენა მიეძღვნება. Dolly Parton: Journey of a Seeker – ასე ჰქვია ექსპოზიციას, რომელიც 20 მაისს გაიხსნება და 2026 წლის სექტემბრამდე გაგრძელდება.
პარტონი უკვე არის Country Music Hall of Fame-ის, Rock and Roll Hall of Fame-ის, Songwriters Hall of Fame-ისა და Nashville Songwriters Hall of Fame-ის წევრი. მას მრავალწლიანი შთამბეჭდავი კარიერა აქვს, როგორც მომღერალს, სიმღერების ავტორს, მსახიობს, მწერალს, ანტრეპრენერს და ფილანთროპს.
„Country Music Hall of Fame-ში გაწევრიანება ჩემი ცხოვრების ერთ-ერთი ყველაზე ღირსშესანიშნავი მომენტი
იყო. ახლა მაქვს შესაძლებლობა, ჩემი პერსონალური გამოფენა წარვუდგინო იმ გულშემატკივრებს, რომლებმაც აქამდე მომიყვანეს. ჩემთვის ეს მართლაც ძალიან დიდი მნიშვნელობის მატარებელია,“ – ამბობს პარტონი.
„დოლი პარტონი აგრძელებს ჩვენს გაოცებას თავისი უსაზღვრო ტალანტით, ინტელექტითა და დიდსულოვნებით. სხვა დიდი ხელოვანების მსგავსად, პარტონმაც დაგვანახა, როგორ შეიძლება აქციო სირთულეები და დაბრკოლებები ხელოვნებად,” – აღნიშნა Country Music Hall of Fame-ის მუზეუმის აღმასრულებელმა დირექტორმა კაილ იანგმა.
გამოფენაზე წარმოდგენილი იქნება კოსტიუმები, ჯილდოები, ინსტრუმენტები, ფოტოსურათები, ხელნაწერი ტექსტები და ექსკლუზიური ინტერვიუები პარტონის კარიერის სხვადასხვა პერიოდიდან. 1978 წელს ის დასახელდა წლის არტისტად Country Music Association-ის მიერ, ხოლო Country Music Hall of Fame-ში 1999 წელს გაწევრიანდა.
გამოფენა წარმოაჩენს პარტონის კარიერის მნიშვნელოვან მომენტებს, მათ შორის მისი ჰიტის, Jolene-ის ხელნაწერ ტექსტს და Sony-ს ხმის ჩამწერ აუდიო მაგნიტოფონს, რომელსაც დოლი პარტონი იყენებდა ისეთი სიმღერების წერისას, როგორიცაა I Will Always Love You, Jolene და The Seeker.
ექსპოზიციაზე ასევე წარმოდგენილი იქნება მუსიკოსის 2006 წლის Kennedy Center Honors-ის მედალიონი და კოვბოის კოსტიუმი, რომელიც პარტონმა მოირგო 1980 წლის ფილმში – 9 to 5. გამოფენაზე იქნება Lucy Adams-ის მიერ შექმნილი კაბა, რომელიც პარტონს Porter Wagoner Show-ზე გამოსვლისას ეცვა და ასევე, 1974 წლის ალბომის, Porter ‘n’ Dolly-ს ყდა.
რაც მთავარია, Dolly Parton: Journey of a Seeker აჩვენებს პარტონის შეუდრეკელ სულს და უნიკალურ შემოქმედებით თუ
ბიზნეს ხედვას. მაგალითად, 13 წლის ასაკში, როცა Grand Ole Opry-ზე გამოსვლაზე ასაკის გამო უარი უთხრეს, პარტონმა და მისმა ბიძამ, ბილ ოუენსმა ჯიმი სი ნიუმენი დაარწმუნეს, რომ თავისი გამოსვლის დრო პარტონისთვის დაეთმო.
გამოფენა ასევე გამოკვეთს 1ათგზის გრემის ლაურეატის საქველმოქმედო საქმიანობას. მათ შორის აღსანიშნავია, რომ 1995 წელს დაარსებული Dolly Parton’s Imagination Library, რომელიც ბავშვებისათვის წიგნების კითხვით დაინტერესებას ემსახურებოდა. 1998 წელს მან
შექმნა Dollywood Foundation, რომლის მთავარი პროგრამაც სწორედ Imagination Library გახდა. დღეს ეს პროგრამა არამხოლოდ აშშ-ის 50 შტატში, არამედ ავსტრალიაში, კანადაში, ირლანდიასა და გაერთიანებულ სამეფოშიც მოქმედებს.
გარდა ახალი გამოფენისა, Country Music Hall of Fame და Museum-ში წარმოდგენილი იქნება ილუსტრირებული წიგნი, რომელიც კიდევ უფრო მრავალფეროვანს ხდის ექსპოზიციას. წიგნი მიმოიხილავს პარტონის კარიერის უმთავრეს წარმატებებს და მკითხველს უზიარებს ისტორიებს მისი ოთხი ყველაზე საყვარელი სიმღერის შესახებ: 9 to 5, Coat of Many Colors, I Will Always Love You და Jolene.
