ანუშკა ჩხეიძე მსმენელს ახალ პროექტს წარუდგენს. Intricate Pipes – ასე ჰქვია ექსპერიმენტულ პროექტს და მისი პრეზენტაცია მონჰაიმის ტრიენალეზე 2025 წლის 4 ივლისს შედგება. ეს არტისტის პირველი საორგანო პროექტია. მასში ის იყენებს ე.წ. Orgamates-ს, რომლებიც ინსტრუმენტების ასაწყობად გამოიყენება. ამ გზით მუსიკოსი აკუსტიკურ ორგანზე საკუთარ ელექტრონულ მუსიკას შეასრულებს.
როგორც ანუშკა ამბობს, ორგანი მისთვის ჯერ კიდევ უცნობი ინსტრუმენტია. „ეს საკრავი ყოველთვის ძალიან მომწონდა, მაგრამ შორიდან. ჩვენი ქვეყნის საეკლესიო მუსიკაში მას არ ვიყენებთ, შესაბამისად ის ჩემთვის ეკლესიასთან არ ასოცირდება. Intricate Pipes ასახავს, თუ როგორ შეიძლება ელექტრონული მუსიკის კომპოზიტორმა გამოიყენოს ორგანი,” – ამბობს ანუშკა ჩხეიძე.
პროექტი ერთგვარად სცდება მონჰაიმის ტრიენალეს ჩარჩოებს. როგორც ანუშკა ჩხეიძე ამბობს, ყოველთვის აინტერესებდა, რა იქნებოდა მისთვის გამორჩეული პროექტი და ვისთან თანამშრომლობა იქნებოდა განსაკუთრებული.
ანუშკა ჩხეიძე:
„მივხვდი, რომ არ მინდოდა კონცერტი ჩემს ცნობილ და საყვარელ არტისტთან. მერჩივნა იმ ინსტრუმენტის გამოცდა, რომელიც ყოველთვის მაინტერესებდა – და ახლა ამის დროა. ვიგრძენი, რომ ეს იყო მომენტი, როდესაც ელექტრონული მუსიკის კომფორტის ზონიდან უნდა გამოვსულიყავი.“
მონჰაიმის ტრიენალე ყოველ სამ წელიწადში ერთხელ ტარდება და თანამედროვე მუსიკის ინოვაციურ მხატვრულ ფორმებს გამოკვეთს. ის ქმნის პლატფორმას, სადაც იმპროვიზებული, კომპოზიციური და პოპულარული თანამედროვე მუსიკა ერთიანდება.
