ერთი დღის შემდეგ, რაც ფანები ახალი სიმღერის პირადად წარდგენით გააოცა, ლორდმა ოფიციალურად გამოსცა მისი ბოლო სინგლი What Was That. ახალზელანდიელმა მომღერალმა ზუსტად 12 საათით ადრე დააანონსა სიმღერა, რომელიც ლორდის პირველი მუსიკალური ნამუშევარია 2021 წლის ალბომის, Solar Power-ის შემდეგ.
What Was That-ის ლაივ დებიუტი სამშაბათს, 22 აპრილს, ვაშინგტონის პარკში შედგა. მომღერალმა ფანები პარკში, დაუდგენელ ღონისძიებაზე მიიწვია, რომელიც პოლიციამ მალევე დახურა, რადგან შესაბამისი ნებართვა გაცემული არ ყოფილა.
უცნობია, იყო თუ არა კონცერტი ლორდის გეგმაში, თუმცა ფანები, რომლებმაც პოლიციის მოწოდების მიუხედავად ტერიტორია არ დატოვეს, მომღერლის გამოჩენით დაჯილდოვდნენ. ლორდმა მათ მხარდაჭერისთვის მადლობა გადაუხადა. მართალია, მას What Was That ცოცხლად არ შეუსრულებია, თუმცა ახალი სინგლის ფონზე ფანებით გარშემორტყმულ სცენაზე იცეკვა. ეს კადრები სიმღერის თანმხლებ მუსიკალურ ვიდეოშიც მოხვდა, რომელშიც ლორდი ნიუ-იორკის გარშემო დადის.
უკვე ორი კვირაა, რაც მომღერალი კარიერის ახალ ეტაპს აანონსებს. „უბრალოდ გამარჯობის თქმა მინდოდა. რადგან ამიერიდან ყველაფერი შეიცვლება. ეს ბოლო წუთებია, სადაც მხოლოდ ჩვენ ვართ. სიგიჟეა, მაგრამ ასეა. სრულიად მზად ვარ,” – ამბობდა მომღერალი ფანებისთვის გაზიარებულ ხმოვან შეტყობინებებში.
მოუსმინეთ ლორდის ახალ სიმღერას What Was That:
