Jazz Unlimited პაპუნა შარიქაძის ახალი ალბომია, რომელიც მომავალ კვირას გამოვა. მანამდე კი მუსიკოსი ამავე სახელწოდების სინგლს აქვეყნებს. ალბომში ოთხი საავტორო კომპოზიცია შედის, რომელთაც პაპუნა შარიქაძე ხატია ქორიძესთან (ბასი) და სოსო ცაგარეიშვილთან (დრამი) ერთად ასრულებს. ალბომი Break Records-ის ლეიბლის ქვეშ ჩაიწერა.
გიორგი ჩაგელიშვილი – Break Records-ის დამფუძნებელი:
„პროექტი სულ 4 ნაწარმოებს მოიცავს, თუმცა ქრონომეტრაჟით ალბომის მასშტაბის გამოვიდა, ამიტომაც დავარქვით ალბომი და არა EP. თავდაპირველად აღნიშნული კომპოზიციების ლაივსესიებად გამოცემა გვინდოდა. გადაღებული გვაქვს ვიდეოებიც, რომლებიც ალბომის გამოსვლის შემდეგ თანდათან „იუთუბზე” დაიდება. ნაწარმოებების ჩაწერის იდეა კი ლაშა გოჩიაშვილს გაუჩნდა ლოპოტას ჯაზკლუბში მოსმენისას, რის შემდეგაც კომპოზიციები Break Records-ის სახლის სტუდიაში ჩავწერეთ. ჩანაწერები კი იმდენად კარგი გამოვიდა, რომ გადავწყვიტეთ, როგორც ალბომი, ისე დაგვემუშავებინა და გამოგვეცა.”
პაპუნა შარიქაძე Break Records-ის არტისტია. ლეიბლის დამფუძნებლის თქმით, ზაფხულში მუშაობა მის კიდევ ერთ ახალ ალბომზე დაიწყება.
