ბიბი კვაჭაძე თავის პირველ EP-ის გამოსცემს. პროექტი, სახელწოდებით Infiltration ექვს ერთმანეთისგან განსხვავებულ კომპოზიციას მოიცავს, რომლებზეც მუსიკოსი ერთი წლის განმავლობაში მუშაობდა.
ბიბი კვაჭაძე:
„15 წლის ასაკიდან საკუთარი ბენდი მყავდა და აქტიურად ვუკრავდი. 62 წლის ვარ და დღემდე უამრავ არტისტთან ვთანამშრომლობ მთელი მსოფლიოს მასშტაბით. შესაბამისად, თითქმის ყველანაირი მუსიკა მაქვს მოსმენილი და განცდილი. ამ დროის განმავლობაში ჩემს გონებაში ზღვა აუდიოინფორმაცია დაილექა და ბევრი ჟანრია ჩემთან ახლოს. თუმცა პირადად ჩემი მუსიკა რა ჟანრს მიეკუთვნება, გულწრფელად რომ ვთქვა, არ ვიცი. ერთადერთი, რაც ზუსტად ვიცი, ისაა, რომ ერთ მუსიკალურ მიმართულებას ჩემი შინაგანი აუდიოკომპასი არასდროს აჩვენებს. ამიტომ, დღეს შეიძლება ბნელი და მძიმე ელექტრონული კომპოზიცია დავწერო, ხვალ – სენტიმენტალური, მელოდიური საფორტეპიანო ნაწარმოები, ზეგ კი საერთოდ ავფეთქდე და როკ ან ფანკალბომი გამოვცე.
ყოველთვის ვცდილობ, შემოქმედებითი საზღვრები გავაფართოო. ეს EP-იც ამის შედეგია. გადავწყვიტე, რომ უკვე დრო იყო, ახლებურ მიდგომას შევჭიდებოდი და აუდიოხმოვანების აუთვისებელ ტერიტორიებზე შემებიჯებინა. ეს არის ექვსი ერთმანეთისგან რადიკალურად განსხვავებული კომპოზიცია, რომლებიც სრულად ინსტრუმენტულია და არ შეიცავს ვოკალურ ხაზს. ამ ნაწარმოებებით ვეცადე, გადმომეცა უამრავი გარკვეული თუ გაურკვეველი შეგრძნება, სირთულე და უბრალოება, ბნელი და ნათელი, რასაც ხშირად ვერც ლიტერატურა და ვერც ვიზუალური ხელოვნება ვერ აღწერს. იმედი მაქვს, რომ მსმენელისთვის ჩემი აუდიომოგზაურობა უცნაური და ამავდროულად საინტერესო იქნება.”
