Lucaroi-მ 16 მაისს ახალი კომპოზიცია, სახელწოდებით Ms policeman გამოუშვა, რომელიც საქართველოში მიმდინარე მოვლენებსა და პოლიციელების ქმედებებს ეხმიანება. სიმღერის არტ ნამუშევარი ნიკა ბელსკაიას (@vividcereal) შექმნილია. კომპოზიციის ტექსტი, მუსიკა, არანჟირება, ვოკალი, მიქსინგი, მასტერინგი და პროდიუსინგი კი თავად Lucaroi-ს (ლუკა სებისკვერაძეს) ეკუთვნის.
„ამ ტრეკის ინსპირაცია იყო საქართველოში არსებული საპოლიციო რეჟიმი. ყველაზე დიდი კითხვა, რაც მათ მიმართ გამიჩნდა – რატომ არ ასრულებდნენ თავიანთ უფლებამოსილებას პირნათლად. ვიფიქრე, რომ ობიექტურ რეალობაში ყველაზე ეფექტური გზა, თუ როგორ შეგიძლია პოლიციელს გააგებინო შენი სათქმელი, ეკლესიაზე გადის. აი, მაგალითად, როგორც მღვდელთან მიდის აღსარებაზე პოლიციელი. ამიტომ ავირჩიე Gospel-ისა და Afrobeats-ის ჟანრი. მინდოდა, ერთგვარად პროტესტანტი პადრეს როლი მომერგო და ყველა პოლიციელისთვის გაგებით შემეხედა, მაგრამ როგორც ხედავთ, ტექსტი ასე არ ჟღერს, იმიტომ, რომ შეუძლებელია, მათ ჩადენილ ქმედებებს გაგებით მოეკიდო.“
მუსიკალური პროექტი Lucaroi პირველად Tbilisi Open Air-ის Newcomers-ზე გამოჩნდა და გამარჯვებულთა შორის მოხვდა, რის შემდეგაც ფესტივალზე ფართო აუდიტორიის წინაშე წარდგა.
უახლოეს მომავალში Lucaroi კიდევ ერთ ახალ სინგლს დააანონსებს, მანამდე კი მოისმინეთ სრულად სიმღერა – Ms policeman:
